ІІM ótken jyldy qorytyndylady: Qylmystardyń shamamen 50%-y – urlyq
Jıynda ótken jyldyń jumys qorytyndysy qaralyp, aldaǵy ýaqytta atqarylatyn mindetter aıqyndaldy. Ár salada jetken jetistikter atalyp, ketken kemshilikter saralandy.
Іshki ister mınıstriniń birinshi orynbasary Marat Qojaev kadr máselesine toqtaldy. Aıtýynsha, jalpy moraldyq-psıhologııalyq ahýal turaqty. Byltyrǵy ózgerister, dálirek aıtqanda, qaǵazbastylyqtan arylý, protsesterdi ońtaılandyrý, jalaqynyń ósýi men basqa da sharalardyń arqasynda polıtsııaǵa jumysqa kelgisi keletinderdiń sany 42%-ǵa, qyzmetke qaıta qabyldanǵandardyń sany 75%-ǵa jetken.
Mınıstrdiń orynbasary Erjan Sadenov polıtsııanyń jedel-izdestirý qyzmeti týraly habarlady. Kisi óltirý, urlyq, mal urlyǵy, tonaý sııaqty jekelegen qylmystarǵa, sondaı-aq erekshe nazar aýdarýdy qajet etetin alaıaqtyq qylmysyna toqtalyp ótti. Máselen, ótken jyly elimizde 22 369 alaıaqtyq deregi, 20 444 ınternet-alaıaqtyq deregi tirkelgen. Bul rette ol áriptesterin profılaktıkalyq jumystardy kúsheıtýge shaqyrdy.
Tergeý salasy boıynsha sóz sóılegen vedomstvo basshysynyń orynbasary Qaırat Sóntaevtyń aıtýynsha, byltyr 91% is elektrondy formatta tergelgen. Tergeý merzimderin buzý kórsetkishi tómendegen. 2022 jyly dál osy salada 744 azamat mınıstrlikte qabyldaýda bolǵan. Onyń ishinde 603 adamdy Tergeý departamentiniń basshylyǵy qabyldaǵan.
Mınıstrdiń orynbasary Igor Lepeha patrýldik polıtsııa qyzmetkerleri tarapynan ketken qatelikter týraly baıandady. Sondaı-aq, eldegi jol qaýipsizdigi men turmystyq zorlyq-zombylyq máselesine erekshe nazar aýdarý kerek ekenin aıtty.
ІІM bastyǵynyń orynbasary Sáken Sársenov tsıfrlandyrý jumystary qandaı deńgeıde ekendigi boıynsha aqparat berdi. Osy oraıda, ol zamanaýı tehnologııalardyń múmkindikterin tolyq paıdalanyp, sondaı-aq azamattarǵa jyldam ári shynaıy aqparat berý jumysyn qarqyndy jalǵastyrý kerektigin atap ótti.
«Ótken jyly úlken ózgeristerdi qolǵa aldyq. Bul – júıeishilik ózgerister, uıymdyq-shtattyq qurylymdy qaıta qaraý, servıstik tásilderdi, jańa tsıfrlyq sheshimderdi engizý, qyzmetkerlerdi áleýmettik qorǵaýdy nyǵaıtý. Osy jumysty jalǵastyramyz», - dedi Marat Ahmetjanov.
Qyzmet basshylaryna tapsyrmalar bere otyryp, mınıstr nazar aýdarýdy talap etetin basym baǵyttardy aıqyndady.
«Múliktik jáne jeke tulǵaǵa qarsy jasalǵan qylmystarmen kúres. Júrgizilgen jumystyń nátıjesinde mundaı qylmystardyń sany azaıdy. Olardy ashý kórsetkishi jaqsardy. Degenmen, barlyq qylmystardyń shamamen 50%-y – urlyq bolyp otyr. Birinshiden, «jazanyń bultartpastyǵy» qaǵıdatyn qamtamasyz etýimiz qajet. Eńbek adamynyń adal tapqan múlki qorǵalýy kerek. Jumysqa bara jatqan azamattar úıiniń qaýipsizdigi úshin alańdamaýy qajet. Bul salada ákimdiktermen, jergilikti qoǵamdastyqpen, basqa da uıymdarmen birlesip áreket etý kerek», - dedi mınıstr.
Prezıdent «aýyldardaǵy quqyq buzýshylyqtardyń aldyn alýdy» qamtamasyz etý mindetin qoıdy. Búgingi tańda aýyldy jerlerge 261 ýchaskelik pýnkt qajet. Osyǵan baılanysty elimizdiń bas polıtseıi PD bastyqtaryna ákimdermen osy máseleni kezeń-kezeńimen sheshýdi tapsyrdy. Marat Ahmetjanov zańdylyq pen tártipti sózsiz saqtaýǵa, tergeýdiń jedeldigin qamtamasyz etýge, kıber jáne esirtki qylmystarynyń aldyn alýdy kúsheıtýge den qoıý kerektigin erekshe atap ótti.
Foto: polisia.kz