ІІM halatpen júrgen polıtseıge qatysty túsinik berdi

ORAL. QazAqparat – Іshki ister mınıstrliginiń Telegram-arnasynda halat kıip, qyzmettik mindetin atqarǵan áıel polıtseıge qatysty túsinik berildi, dep habarlaıdy QazAqparat.

Áleýmettik jelilerde úı kıiminde qyzmettik mindetin atqarǵan polıtsııa qyzmetkeri týraly vıdeo taraı bastady. Osyǵan baılanysty ІІM túsinik berdi.

«8 shilde kúni keshki saǵat 11-de Derkól kentinde óz úıinde bolǵan Oral qalasynyń ıývenaldy polıtsııa bólimshesiniń qyzmetkeri ata-anasynyń erip júrýinsiz kóshede júrgen kámeletke tolmaǵan 3 balany kórgen. Ol balalarǵa qaýip tónýi múmkindigin eskerip, dereý shara qabyldaǵan.

Azamattyq kıim úlgisinde bolsa da, ol óz mindetin atqara otyryp, balalar úshin jaýapkershilikti sezingen. Jumysta bolmaǵanyna qaramastan, atalǵan qyzmetker úıiniń janynda bolyp jatqan mán-jaıdy kóre otyryp, dereý zańdy ókilderin anyqtaǵan, polıtsııa jasaǵyn shaqyrǵan.

Osyndaı faktilerdi boldyrmaý jáne quqyq buzýshylyqtyń aldyn alý úshin zańdy ókilderge QR Ákimshilik quqyqbuzýshylyq týraly kodekstiń 442-baby 2-bóliginiń talaptaryn buzǵany úshin ákimshilik hattamalar toltyrylǵan.

Alaıda balalardyń ata-analarynyń biri ákimshilik hattama jasalǵanyna yzalanyp, qyzmetker úı kıiminde óz ókilettigin júzege asyrýǵa quqyǵy joqtyǵyn alǵa tartyp, vıdeoǵa túsire bastaǵan», - delingen málimdemede.