ІІM Arysta joǵalǵan adamdar týraly aqparatqa pikir bildirdi

NUR-SULTAN. QazAqparat - QR Іshki ister mınıstrligi Arys qalasynda 350 adamnyń joǵalyp ketkeni týraly aqparatqa baılanysty resmı málimet berdi, dep habarlaıdy QazAqapart.

«Arys qalasynda jarylys bolǵan kúni 350 adam joǵalyp ketkeni týraly aqparat taraǵan bolatyn.Sol kúni-aq atalmysh aqparat boıynsha ýaqtyly málimdemeler jasaldy. Polıtsııa qyzmetkerleri men Ulttyq ulan áskerı qyzmetshileri Arys qalasynyń turǵyndaryn evakýatsııalaý jáne olardyń kim ekenin anyqtaý boıynsha barlyq tıisti sharalardy júrgizdi. Qazaqstan Respýblıkasynyń ishki ister mınıstrligi turǵyndardy áleýmettik jeliler arqyly jáne WhatsApp jelisi boıynsha taralatyn jalǵan aqparatqa senbeýlerin jáne úreıge boı aldyrmaýdy suraıdy», - delingen resmı málimette.

Mınıstrlik qasaqana jalǵan aqparat taratqandar QR qylmystyq kodeksiniń 274-baby boıynsha qylmystyq jaýapkershilikke tartylatynyn, arnaıy qurylǵan jedel shtab arqyly taraǵan resmı aqparattarǵa ǵana sený kerektigin eskertedi.

«Arys qalasynda bolǵan jaǵdaıǵa baılanysty Shymkent qalasy TJ departamentinde «Qaýyrt jelisi» jumys jasaıtyndyǵyn eske salamyz. Táýlik boıy 8/7252/44-94-72 nemese 8/7252/35-33-66 telefon nómiri boıynsha qajetti aqparatty ala alasyzdar», - delingen ІІM baspasóz qyzmeti taratqan aqparatta.

Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Buǵan deıin úsh adam qaza tapty. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.