ІІM armıan nómirli kólikterge qatysty habarlamany tekserip jatyr

NUR-SULTAN. QazAqparat - Іshki ister mınıstriniń orynbasary Alekseı Kalaıchıdı armıan nómirli kólikterdi tekserýge qatysty taraǵan habarlamaǵa qatysty pikir bildirdi, dep habarlaıdy QazAqparat tilshisi.

Aıta ketsek, áleýmettik jelilerde (vatsapta) armıan nómirli kólikterge tolyqqandy tekserý júrgizý jáne ondaı kólik mingen júrgizýshilerge hattama toltyrýǵa buıryq berip jatqan aýdıohabarlama tarap ketken bolatyn. Aýdıohabarlamamen birge elordanyń polıtsııa departamentiniń jol-patrýldik qyzmeti komandıri mindetin atqarýshysynyń fotosýreti birge jarııalanǵan.

Alekseı Kalaıchıdı atalǵan aýdıohabarlamanyń taralýyna qatysty tekserý júrgizilip jatqanyn aıtty.

«Bul rette qosymsha áreket etýge týra keledi. Sebebi, aýdıohabarlamany kimniń taratqanyn bilý úshin daýys saraptamasyn júrgizý kerek. Sebebi, bul aıtarlyqtaı salmaqty habarlama. Laıyqty ári qatal sharalar qabyldanatynyn aıtqym keledi. Ol týraly BAQ ókilderine qosymsha habar beretin bolamyz. Bul ispen ózindik qaýipsizdik departamenti aınalysýda», - deıdi vıtse-mınıstr Іshki ister organdaryndaǵy jemqorlyqpen kúrestiń úshjaqty jospary talqylanǵan otyrystan keıin tilshilerge.

Aıta ketsek, búgin elordada ІІM men Memlekettik qyzmet isteri jáne sybaılas jemqorlyqqa qarsy is-qımyl agenttigi basshylyǵy, azamattyq qoǵam jáne BAQ ókilderimen kezdesý ótti. Kezdesýde ishki ister mınıstrliginiń Jol kartasy negizinde qoǵamdastyq jáne vedomstvolar ázirlegen ishki ister organdaryndaǵy jemqorlyqpen kúrestiń úshjaqty jospary tanystyryldy.

«Reformanyń baǵdarlamasyn ázirleýde belsendi túrde atsalysyp júrgen azamattarǵa erekshe alǵysymdy aıtqym keledi. ІІM Sizdermen árdaıym birlese eńbek etýge daıyn. ІІM tek synnyń astynda qalatyn organ emes, senimge ıe bolǵanyn qalaımyz», - deıdi ishki ister mınıstri Erlan Turǵymbaev.