ІІM: Antıfrod-júıeniń arqasynda alaıaqtardyń 34 mln qońyraýy buǵattaldy

ASTANA. QazAqparat - Sońǵy jyldary bank qyzmetkerleriniń atynan jasalǵan telefon alaıaqtyqtary jıilep ketti. Qylmyskerler kóbine nómirdi aýystyrý qyzmetin paıdalanady. Ótken jyly polıtsııa qyzmetkerleri osyndaı 3600 qylmysty anyqtady, – dep habarlaıdy Polisia.kz.

Osyǵan baılanysty ІІM olardy buǵattaý máselesin kóterdi. Vedomstvo Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip, «Ksell», «KaR-Tel», «Altel» jáne «Tele2» uıaly baılanys operatorlarynyń antıfrod-júıeleriniń derekqorlaryn biriktirýdi uıymdastyrdy. Qabyldanǵan tehnıkalyq sharalar qazaqstandyq abonenttik nómirlerge halyqaralyq trafık arqyly ótetin frod-qońyraýlardy tanýǵa jáne buǵattaýǵa múmkindik berdi. Nátıjesinde ótken jyldyń 6 aıynda 19 mln alaıaqtyq qońyraý buǵattaldy, al aǵymdaǵy jyldyń basynan beri anyqtalǵan qońyraýlar 15 mln-nan asady.

Osyndaı qylmystar jasaýǵa qatysy bar adamdardy anyqtaý, onyń ishinde «call-ortalyqtar» dep atalatyn qyzmetti beıtaraptandyrý jáne jolyn kesý boıynsha sharalar qabyldanýda.

Máselen, ótken jyly el aýmaǵynda ınternet-alaıaqtyq kezinde urlanǵan aqshany qolma-qol aqshaǵa aınaldyrýmen aınalysqan 5 transulttyq qylmystyq top anyqtalyp, joly kesildi.

Ótken jyldyń jeltoqsan aıynda Ýkraınanyń ulttyq polıtsııasymen birge Dnepropetrovsk oblysynyń aýmaǵynda arnaıy operatsııa júrgizildi. Sonyń nátıjesinde qazaqstandyqtardy aldaýmen aınalysqan Ýkraınanyń 32 turǵynynan turatyn qylmystyq top joıyldy.

Qabyldanǵan sharalardyń nátıjesinde IP-telefonııany paıdalanýmen baılanysty telefon alaıaqtyǵynyń sany eki ese tómendegenin atap ótken jón.