Igor Son: Tokıo Olımpıadasyna deıin mundaı aýyr salmaqty kótergen emespin

NUR-SULTAN. QazAqparat - Tokıo Olımpıadasynyń qola júldegeri, ziltemirshi Igor Son jeńisten keıin Ulttyq olımpıada komıtetiniń resmı saıtyna suhbat berdi, dep habarlaıdy QazAqparat.

Búgin Tokıodaǵy Olımpıada oıyndarynda qazaqstandyq ziltemirshi Igor Son qola medal jeńip aldy.

Sportshy jarys kezinde qatty qobaljyǵanyn jasyrmady.

«Oıymdy jınaqtaýǵa týra keldi. Qalaı ýaıymdaǵanymdy sózben jetkize almaımyn. Tokıoǵa deıin osynsha salmaq kótergen emespin. Demek, bul meniń iri jarystarda kórsetken eń jaqsy nátıjem. Jattyǵý zalynda qarsylastardy baqylap otyrdyq.

Basty qarsylasym ziltemirdi qısaıtyp alǵan kezde de ýaıymym kete qoımady. Bári bolýy múmkin ǵoı. Men julqa kóterýden jaqsymyn, serpe kóterýde biraz qıyndyq bar.

Al tóreshiler eseptemeı qoıǵan eki múmkindikke keler bolsaq, ekeýinde de shyntaǵymnyń qozǵalǵany keri áser etti. Bári taza bolýy kerek.

Rahmet, Qazaqstan! Maǵan qoldaý kórsetkenderdiń bárine alǵys aıtamyn. Alǵa, Qazaqstan», - dedi Son.

Foto: Turar Qazanǵapov, Qazaqstan UOK