Igi ister marafony: elordalyq eriktiler zeınetkerlerge kómektesti

<p>ASTANA. KAZINFORM - Igi ister marafony aıasynda elordalyq eriktiler jalǵyz turatyn zeınetkerlerdiń aýlasynyń qaryn kúrep, qarııa kisilerdiń alǵysyn aldy, dep habarlaıdy elorda ákimdiginiń resmı saıty.</p>

Búgin Baıqońyr aýdanynda qaıyrymdylyq aktsııasy uıymdastyryldy. 20-ǵa jýyq belsendi qar kúreýge kómektesti. Sebebi, kún jylynǵannan keıin qar erip, mańaıdy sý basýy múmkin. Eriktiler aýlanyń qaryn kúrep, kommýnaldyq qyzmetter alyp ketý úshin jolǵa shyǵaryp qoıdy.

Maks Altaev esimdi jas jigittiń aıtýynsha, 2021 jyldan beri «Astana jastary» eriktileriniń qatarynda atsalysyp júr.

«Jyl saıyn biz kómekke muqtaj qart kisilerge kómektesý úshin jer úılerge baramyz. Aýlanyń qaryn kúrep kómektesemiz. Erigen qar sýynyń aýlany basyp qalýy múmkin. Degenmen olardyń júzderindegi qýanysh bizdiń júregimizge de jylý berip, erekshe kúsh syılaıdy», – dedi ol.

Foto: Astana ákimdigi

 

Aýlanyń qaryn kúreý qart kisiler úshin ońaı emes, sol sebepti tosynnan kelgennen mundaı kómekke rızashylyǵyn bildirip jatady.

«Balalarǵa alǵysym sheksiz. Olardyń kómegine rızamyn. Jasym kelip, boıymnan qýat ketkennen keıin aýlanyń qaryn kúreý de muńǵa aınaldy. Al kómekke kelgen jastar meni bir tyǵyryqtan alyp shyǵaıyn dep tur», – dep Valentına Sergıenko aǵynan jaryldy.

Aıta keteıik, «Astana jastary» belsendileri qalany táýlik boıy qardan tazartatyn kommýnaldyq qyzmet mamandaryna da kómek qolyn sozady. Eriktiler ystyq shaı men baýyrsaqtar taratý aktsııalaryn jıi ótkizedi.