Iesiz qalǵan elektr jelileri energııa tartýshy uıymdarǵa beriledi
Úkimet otyrysynda baıandama jasaǵan Energetıka mınıstri Nurlan Noǵaev bıyl 8 energoblokty, 59 qazandyq pen 44 týrbınany jóndeý josparlanǵanyn aıtyp ótti. Maýsym aıynyń basynda 3 energoblokta, 5 qazandyqta jáne 8 týrbınada jumystar aıaqtalyp qoıǵan. Jóndeýdiń ártúrli satylarynda 3 energoblokta, 21 qazandyqta jáne 9 týrbınada jumystar júrgizilýde. Jalpy jóndeý jumystary kestege sáıkes oryndalyp jatyr.
«Qazaqstannyń birtutas elektr energetıkalyq júıesiniń elektr jelilerin 2020-2021 jyldardaǵy kúzgi-qysqy kezeńge daıyndaý úshin jalpy uzyndyǵy 25 828 shaqyrymdy elektr jelilerin, sondaı-aq 429 birlik joǵary voltty qosalqy stantsııalardy jóndeý josparlanǵan. Búgingi kúni elektr jelilerinde 1140 km elektr berý jelileri men 65 shaǵyn stantsııaǵa jóndeý jumystary júrgizildi», - dedi ol.
Nurlan Noǵaev sonymen birge ıesiz dep tanylǵan elektr jelilerin joıý boıynsha júrgizilip jatqan jumystarǵa toqtaldy. Mınıstrdiń aıtýynsha, «100 naqty qadam» Ult josparynyń 51-qadamynda belgilengen mindetterdi júzege asyrý aıasynda ıesiz jelilerdi joıý qarastyrylǵan.
«Aýqymdy jumys atqaryldy. Iesiz jelilerdiń uzyndyǵy edáýir tómendedi. Júrgizilgen jumystyń qorytyndysy boıynsha 2020 jylǵy qańtardaǵy jaǵdaı boıynsha ıesiz elektr jelileriniń uzyndyǵy 225 shaqyrymdy jáne 98 transformatorlyq qosalqy stantsııany qurady», - dep habarlady N. Noǵaev.
Jalpy alǵanda, anyqtalǵan ıesiz elektr jelileri 2020 jyldyń sońyna deıin energııa berýshi uıymdardyń balansyna berilýi tıis.