I. Rogov: Konstıtýtsııalyq qundylyqtar arqasynda Qazaqstanda 120 etnos pen 17 dinı konfessııa ókilderi tatý tirshilik keshýde
Keńes tóraǵasynyń aıtýynsha, Qazaqstannyń Ata Zańy qoǵamdyq kelisim men azamattar teńdiginiń qazaqstandyq úlgisi úshin berik negiz qalady. Al bul qazaqstandyq úlgi qazirgi tańda shet memleketterge keńinen taralyp, zerdelenip jatyr.
«Qazaqstandyq ultaralyq kelisim úlgisiniń tabysty bolýy Konstıtýtsııa erejelerinen bastaý alady. Al Ata Zańda barlyq azamattardyń zań aldynda teńdigi, kez kelgen másele boıynsha kemsitýshilikke jol bermeýge, ıdeologııalyq, saıası alýantúrli qoǵamdyq kelisim men saıası turaqtylyq respýblıkanyń basty qaǵıdaty retinde aıqyndalǵan», - dedi I. Rogov.
Sonymen qatar, Keńes Tóraǵasy sońǵy jyldary shet memleketter arasynda qazaqstandyq qoǵamdyq kelisim úlgisine erekshe qyzyǵýshylyq arta bastaǵanyn atap ótti. Sonyń ishinde sarapshylar Parlamenttegi Qazaqstan halqy Assambleıasynyń kvotalary, ulttyq-mádenı jáne basqa da qoǵamdyq mańyzdy múddelerdiń eskerilýin qamtamasyz etý, ana tiline qurmet, tárbıe men oqytý sekildi tájirıbelerge, sondaı-aq zań aktileriniń qabyldaný tehnologııalaryna qyzyǵýshylyq tanytyp keledi.
«Qazaqstandyq úlginiń shet memleketterde keńinen zerdelenip jatqany týraly sóz bolǵanda, men ony Venetsıandyq komıssııanyń bir múshesi retinde aıtyp otyrmyn. Óıtkeni, áriptesterimizdiń zor qyzyǵýshylyǵy bolǵandyqtan da maǵan osy komıssııa aıasynda bizdiń tájirıbemiz týraly birneshe márte sóz sóıleýge týra kelgen bolatyn. Túıindeı aıtqanda, konstıtýtsııalyq tolyqqandy qundylyqtardyń nátıjesinde Qazaqstanda 120 etnos pen 17 dinı konfessııa ókilderi beıbitshilik pen kelisimde ómir súrip, tatý tirshilik keship jatyr», - dedi I. Rogov.