І Áskerı-patrıottyq ánder baıqaýynyń jeńimpazdary gala-kontsert berdi

ASTANA. QazAqparat - Astanadaǵy Beıbitshilik jáne kelisim saraıynda QR Tuńǵysh Prezıdenti kúnin merekeleýge oraılastyrylǵan І respýblıkalyq «Sarbaz ánderi» áskerı-patrıottyq ánder baıqaýynyń gala-kontserti ótti, dep habarlady QazAqparatqa vedomstvonyń baspasóz qyzmetinen.

Joba aǵymdaǵy jyldyń qyrkúıeginde bastaý aldy jáne osy ýaqyt ishinde onyń «qorjynyna» 120-ǵa jýyq týyndy kelip tústi. Sheshýshi kezeńge 13 úzdik án iriktep alyndy.

Nátıjesinde, respýblıkalyq baıqaýdyń bas júldesin Asylzat Isataıdyń sózi men Beıbit Birimǵazınniń  áýenine jazylǵan «Jaýynger» áni jeńip aldy. Otan qorǵaýshylardyń oń beınesin asha túsetin ánder nomınatsııasynda birinshi oryndardy «Sapqa» tur» jáne «Uly dala sarbazy» shyǵarmalary jeńip aldy. Ásker túrleri men tekteri boıynsha «Tankishiler» týyndysy «úzdik án» dep tanyldy.

Áskerı-patrıottyq ánder ulttyq baıqaýynyń jeńimpazdary baǵaly syılyqtarmen jáne qurmet gramotalarymen marapattaldy.

Odan basqa, is-shara aıasynda gala-kontsertke jınalǵan meımandarǵa QR QK Ulttyq áskerı-patrıottyq ortalyǵynyń bı ujymdary, balet toptary men estrada-sımfonııalyq orkestriniń ónerleri usynyldy. Qazaqstandyq estrada juldyzdarynyń oryndaýyndaǵy jańa ánderdiń tusaýkeseri baıqaý uıymdastyrýshylarynyń erekshe tosynsyıy boldy.