Hyundai, Chevrolet, Kia: Bıyl qazaqstandyqtar satyp alǵan kólik markalary

ASTANA. QazAqparat – Bıyl qazaqstandyqtar 66 myńnan astam jańa avtomobıl satyp aldy. Bul týraly Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat tilshisi.

«Qazaqstan Avtobıznes qaýymdastyǵynyń derekterine sáıkes, ekinshi aı qatarynan aılyq satylymda rekorrdtyq kórsetkish tirkelip otyr. Mamyrda qazaqstandyq dılerler 14 688 jeńil avtomobıl men kommertsııalyq tehnıka satty. Bul ótken jyldyń mamyryndaǵy kórsetkishten 77,2 paıyzǵa kóp», - delingen mınıstrliktiń agenttiktiń resmı saýalyna bergen jaýabynda.

2023 jyldyń 5 aıynda el turǵyndary 66 331 jańa jeńil avtomobıl, júk kóligi men avtobýs satyp aldy.

Bul ótken jyldyń kórsetkishinen 65,8 paıyzǵa joǵary. Eń kóp satylǵan brendter - Hyundai, Chevrolet jáne Kia.

Sonymen qatar mınıstrlik avtomobıl baǵasynyń tómendeýine yqpal etýi múmkin faktorlardy atady.

«Qazirgi ýaqytta jańa avtomobılder naryǵynda kólik satyp alýǵa qatysty túrli aktsııalardyń iske qosylǵany baıqalady. Olar – nesıeleý baǵdarlamasy, aktsııalar, tólemdi keıinge shegerý jáne taǵy basqalary. Avtomobıl baǵasynyń ózgerýine suranys pen usynystyń qubylýy, ekonomıkalyq konıýktýra, naryqtaǵy báseke jáne basqa da faktorlar áser etýi múmkin. Naryqtaǵy jaǵdaı men avtomobıl salasyndaǵy úrdis ýaqyt óte kele ózgerýi yqtımal. Oǵan ekonomıkalyq turaqtylyq, tutynýshylyq suranystyń ózgerýi jáne ózge de syrtqy áser syndy túrli faktor yqpal ete alady», - delingen vedomstvo jaýabynda.