Hýseın Ozhan: Qazaqstan úshin kómirtegi beıtaraptyǵy – arman emes, aqıqat

ASTANA. QazAqparat – Eýropalyq qaıta qurý jáne damý bankiniń (EQDB) Qazaqstandaǵy dırektory Hýseın Ozhan Astana halyqaralyq forýmy aıasynda Jibek Joly telearnasy stýdııasynda qonaq boldy. Suhbat barysynda ol jáne telejúrgizýshi Kúnsaıa Qurmet EQDB júrgizgen «Orta dáliz» zertteýi, Qazaqstan ekonomıkasyn kómirteksizdendirý jáne Qazaqstannyń 2060 jylǵa qaraı kómirteginen beıtarap bolýy múmkindigi jaıly áńgimelesti, dep habarlaıdy QazAqparat tilshisi.

Suhbat barysynda Hýseın Ozhan EQDB Qazaqstandaǵy 310-nan astam jobaǵa 10 mıllıard AQSh dollarynan astam ınvestıtsııa salǵanyn atap ótti.

«Bul jobalar árbir salany, biraq negizinen ınfraqurylymdy, energetıkany, ásirese sońǵy jyldary qarjy sektoryn, óndiris pen qyzmetterdi, tabıǵı resýrstardy, taý-ken ónerkásibin qamtıdy. Osylaısha ınvestıtsııa jumystyń keń aýqymyn qamtydy. Eldiń barlyq óńirinde ınvestıtsııa bar ekenin rızashylyqpen atap ótkim keledi. Men úshin bul qýanysh. Óıtkeni saıahattaǵan kezimde jobalardyń búkil Qazaqstan boıynsha iske asyp jatqanyn kóremin. Muny kórý jáne el damýynyń bir bóligi bolý - naǵyz lázzat», - dep atap ótti ol.

«Orta dáliz» bastamasyna qatysty suraqqa jaýap bergen ol «Orta dáliz» nemese Transkaspıı baǵyty, ásirese sońǵy jyldary qazirgi geosaıası jaǵdaıdy eskere otyryp, úlken mańyzǵa ıe bolǵanyn atap ótti.

«Biz ótken jyly Eýropalyq Odaq qarjylandyratyn, biraq EQDB júrgizgen úlken zertteý jasadyq», - dedi Hýseın Ozhan.

Qazaqstandaǵy EQDB dırektory Ortalyq Azııanyń barlyq elin qamtıtyn eń tıimdi baǵyt retinde Qorǵastan shyǵatyn, odan ári Qazaqstanda Almaty, Shymkent arqyly ótetin, Tashkentke kirip, odan keıin qaıtadan Qazaqstandaǵy Aqtaý arqyly Kaspıı teńizinen Bakýge deıin kesip ótetin jáne Bakýden Grýzııaǵa baratyn, ári qaraı Eýropaǵa shyǵý úshin Qara teńizge jáne Túrkııaǵa jetetin joldy atady.

«Bul barynsha ekonomıkalyq ınklıýzıvti ári eń tıimdi baǵyt sanalady», - dedi ol.

Onyń paıymynsha, Qazaqstan 2060 jylǵa qaraı kómirtegi beıtarap el bola alady dep esepteıdi. Biraq ol ońaıǵa soqpaıdy.

«Bul órshil maqsat. Biraq bul múmkin emes degendi bildirmeıdi. Múmkin bul aqylǵa qonymdy da shyǵar. Biz tek jańartylatyn energııa týraly ǵana emes, sonymen qatar energııa tıimdiligi, barlyq sektorda energııa tıimdiligin arttyrý týraly aıtyp otyrmyz. Jańartylatyn energııa mańyzdy komponent bolyp sanalǵanymen jalǵyz emes. Energııa óndirisin ulǵaıtýmen qatar, elektr energııasyn óndirýdiń quramy, saıyp kelgende, kómirden elektr energııasyn óndirýdi azaıtý mańyzdy sanalady. Biraq bizde ekologııalyq taza tehnologııaǵa aýysa alatyn óndiris oryndary da bar. Sondaı-aq, Samuryq-Qazyna sııaqty kóptegen kompanııalardyń kómirteksizdendirýge qatysty ózindik strategııalary ázirlengen. Sonymen qatar biz qalalarmen de jumys isteımiz. Qazaqstanda «jasyl qalalar baǵdarlamasyna qosylǵan tórt jasyl qala bar. Olar – Almaty, Shymkent, Semeı jáne Óskemen. Osy kúsh-jigerdiń barlyǵyn júıeli túrde biriktirgende kómirtekti beıtaraptyq arman emes, aqıqat. 2060 jyly kómirtegi beıtarap Qazaqstandy kóremiz dep senemin»,-dedi ol.