Hromtaý aýrýhanasynda stomatıti asqynǵan balanyń anasy dárigerlerdi jazalaýdy surady

<p>Aqtóbe oblysy Hromtaý aýdanynda qyzylsha, stomatıt dıagnozy boıynsha em qabyldaǵan 12 jastaǵy jasóspirim qaıta ınfektsııalyq aýrýhanaǵa tústi. Naýqastyń anasy emdi durys júrgizbegen dárigerlerdiń jazalanýyn suraıdy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aqtóbe oblysy Hromtaý aýdany Kóktaý aýylynyń 12 jastaǵy turǵyny 21 qarasha kúni aýyryp, aýrýhanaǵa túsken.

Sol kezde onyń tańdaıy qyzaryp, aýyz qýysy bórtip turǵany belgili boldy.

— Ózim stomatıt dep topshyladym. Dárigerler qyzylsha, stomatıt dep aıtty. Biraq ol qyzylsha juqtyrmaǵan. Bala bir apta em qabyldaǵan soń aýrýhanaǵa bardym, pedıatrmen sóılestim. Ol «bala jaqsy, táýir bolyp kele jatyr» dedi. Sodan keıin basshylaryna da jolyqtym. «Vahtaǵa ketip bara jatyrmyn. Balany emdeı almasańdar Aqtóbege alyp keteıin» dep aıttym. Sebebi onyń aldynda medbıkemen sóılesip, aýzyn nemen shaıyp jatqanyn suraǵam. Ol aýzyna ne bolǵanyn uqpaı, keıin sodamen shaıyp jatqanyn aıtty. Sodamen úıde de shaıa alatyn edim. Sebebi bala tamaq ishe almaı jatty. Ekinshi apta da ótti. Ózim jumysta bolǵan soń balamdy aýrýhanadan atam alyp ketti. Qolynda «jazylyp kele jatyr» dep jazylǵan qujaty da bar. Ózim seısenbi kúni úıge kelgende balam tósekte jatyr. Tamaq ishe almaıdy, sóılemeıdi. Balamdy kórgende sóıleı almaı qaldym, — deıdi jasóspirimniń anasy Aıym Qozbaqova.

Foto: Altynaı Saǵyndyqova/Kazinform

Keıin ony birden Aqtóbe qalasyndaǵy oblystyq balalar aýrýhanasyna ákeledi.

Sol jerde birneshe dáriger qarap, oblystyq ınfektsııalyq aýrýhanaǵa jatqyzdy.

— Balanyń áli joq, qur súıegi qalǵan. 12 jasar bala 37 keli boldy. «3-4 kún ótkende baladan aıyrylatyn edińiz» dep te aıtty. Sonymen birge Hromtaý aýrýhanasy balany kvartsqa jatqyzyp qoıǵan, denesiniń bárin kúıdirip tastapty. Aldaǵy ýaqytta oblystyq densaýlyq saqtaý basqarmasyna shaǵym jazamyn, — dedi ol.

Oblystyq densaýlyq saqtaý basqarmasy mán-jaıdan habardar. Qazir tekserý jumysy júrip jatyr.

— Naýqas qyzylsha ınfektsııasy, stomatıt dıaznozymen aýdandyq aýrýhanaǵa tústi. Qyzylsha ınfektsııasynyń asqynýynan bolǵan stomatıt. Em hattama boıynsha júrgizildi. Stomatıti asqynǵan soń em-domǵa ózgertýler engizildi. Vırýsqa qarsy preparattar taǵaıyndaldy. Sonymen birge aýyz qýysy súrtilip jatyr. Aýdandyq aýrýhananyń, sonymen birge oblystyń stomatology keńes berdi. Aýrýhanadan shyǵarylǵan soń oblystyq ınfektsııalyq aýrýhanaǵa túsip tur. Qazir jaǵdaıy jaqsaryp keledi. Tekserý júrgiziledi, — dep habarlady oblystyq densaýlyq saqtaý basqarmasy.