Hrıstıan álemi Pasha merekesin toılap jatyr

ASTANA. QazAqparat - Búgin Hrıstıan áleminiń bas merekesi - Qasıetti Hrıstostyń qaıta tirilýi nemese Pasha meıramyn álemdegi mıllıondaǵan turǵyn toılap jatyr, dep jazady TASS. 

Pasha merekesi bastalǵan kúni 48 kúnge sozylǵan aýyz bekitý aıaqtalady. Osy ýaqyt aralyǵynda hrıstıan dinin ustanatyn adamdar mal etinen bas tartyp, jaman ádetterden boıyn aýlaq ustaıdy. Boıyn tártipke úıretip, jıi syıynady. Osylaısha rýhanı tazarady.

Pashaǵa hrıstıandar erekshe daıyndalady: úılerin tazalap, merekelik astardy ázirleıdi. Boıalǵan jumyrtqalardy pisiredi. Tek bul kúni qabirlerdi zııarat etý quptalmaıdy. Marqumdardy eske alý úshin pravoslavtyq kúntizbede arnaıy kún bar - Radonıtsa, ol bıyl 25 sáýir kúni atalyp ótedi.

2 ǵasyrdan bastap Pasha hrıstıandardyń resmı dinı meıramyna aınalǵan. Biraq ár shirkeý ony ózinshe toılaǵan, ár mazhab ony óz kúninde, óz dástúrimen atap ótken. Sońdyqtan, Urym, Aleksandrııa men Kishi Azııa shirkeýleri arasynda «Pashalyq daý» paıda bolǵan. Aqyrynda bul daý epıskoptardyń Nıkeı sınodynda sheshilgen.

Osylaısha, 325 jyldan bastap Pashany kóktemgi kún men túnniń teńelýi kúninen (bul qubylys Naýryzǵa sáıkes, naýryzdyń 21-inde bolady) keıin birinshi tolǵan aıdan keıin kelesi jeksenbide toılaıdy. Pashanyń ýaqyty ár jyly ár kúnge túsip otyrady, biraq sáýir aıynda nemese mamyr aıynyń basynda bolady.