Hosteldegi órt oqıǵasy: prokýror aıyptaý aktisin oqydy
Іs Almaly aýdandyq sotynda sýdıa Ernar Qasymbekovtiń tóraǵalyǵymen qaralyp jatyr.
QR Qylmystyq kodeksiniń 292-babynyń 3-bóligi (Abaısyzda eki nemese odan da kóp adamnyń ólimine ákelip soqqan órt qaýipsizdigi talaptaryn buzý) boıynsha eki adamǵa aıyp taǵylyp otyr. Olar - Ádilbek Muhamedıarov pen Aleksandr Pekelnık.
Sot otyrysynda prokýror Nurazhan Myrzaly aıyptaý aktisin oqydy.
Memlekettik aıyptaýshy taraptyń málimetinshe, 2022 jyly kásipker «Gıdservıs» mekemesi men ǵımarat ıesi «Qusa halyq» JShS arasynda qoldanystaǵy órt dabyly júıesin dıagnostıkalaý jáne tekserý úshin kelisim-shart jasalǵan.
Pekelnık órtten qorǵaý júıelerin jobalaýǵa qajetti lıtsenzııasynyń joqtyǵyna qaramastan, qoldanystaǵy dabyl júıesin vızýaldy tekserip, dıagnostıka júrgizgen. Biraq ol bólmelerdiń fýnktsıonaldyq maqsattary men erekshelikterin eskermedi. Nátıjesinde ol ornatylǵan júıe odan ári paıdalanýǵa jaramsyz degen qorytyndyǵa keldi.
Prokýrordyń aıtýynsha, sottalýshy órt kezinde iske qosylatyn dabyl jabdyqtaryn jetkiliksiz ornatqan, bul keıinirek iske qosylǵan kezde júıeniń dybysy tolyq shyqpaǵan.
Keıinnen Pekelnıktiń jumysyn «Kusa Halyq» JShS qabyldap alǵan.
Prokýrordyń sózinshe, ǵımarat dúkenge arnalǵan. Ádilbek Muhamedıarov «Qusa halyq» JShS-men jalǵa berý shartyn jasasqan soń, ol jerden hostel ashqan. Hostel bólmeleri 2023 jyldyń qyrkúıeginde, órtten eki aı buryn jalǵa alynǵan.
«Aıyptalýshy Muhamedıarov ǵımarattyń fýnktsıonaldyq maqsatyn ózgertip, jóndeý jumystaryn júrgizgen. Sonymen qatar jalǵa alýshy ol jerde órt qaýipsizdigi talaptaryn saqtamaǵan. Dálizge tósekter ornalastyryp, birinshi qabattaǵy evakýatsııalyq esikti jıhazdarmen jaýyp tastaǵan. Sondaı-aq jertóleniń avarııalyq shyǵý esikterin bekitip qoıǵan», - dedi prokýror Nurazhan Myrzaly.
Onyń aıtýynsha, byltyr 30 qarashada saǵat 05:30 shamasynda №15 bólmeniń aldyndaǵy jertóle dálizinde órt shyqqan. Qyzyl jalyn 15 bólmeniń kireberis esiginiń aldyndaǵy qabyrǵaǵa súıep qoıǵan matratstardy sharpyǵan. Hostel turǵyndary órt týraly habardar bolǵannan keıin 67 adam bólmelerinen evakýatsııalandy.
«Osy órt kezinde Pekelnık ornatqan órt qaýipsizdigi júıesi durys jumys istemedi, atap aıtqanda, órt dabyldarynyń sany jertóleniń barlyq turǵyn bólmelerinde qajetti dybysty qamtamasyz etpedi, sonyń saldarynan 14, 15, 16 uıqylarynan oıanbaı qaldy. Onyń ústine dálizde órtengen matratstar №15 jáne №16 bólmelerdiń turǵyndaryna kedergi keltirdi», - dedi prokýror.
Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam mert boldy.
Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.
Keıinirek órtengen hosteldiń ıeleri belgili boldy.
Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.
Ótken jyldyń jeltoqsan aıynda hosteldiń basshysy ustaldy.
Osy jyldyń qyrkúıek aıynda Almaty qalasynyń prokýratýrasy hosteldegi órtke baılanysty tergeýdiń aıaqtalǵanyn habarlady.
Osyǵan deıin alǵashqy sot otyrysy ótkeni týraly jazǵan edik.