Hokkeıden álem chempıonatynda Qazaqstan Italııany 5:2 esebimen jeńdi

NUR-SULTAN. QazAqparat - Shaıbaly hokkeıden álem chempıonatynda top-dıvızıonda Qazaqstan quramasy búgin, 23 mamyrda kezekti oıynyn Italııaǵa qarsy ótkizdi, dep habarlaıdy QazAqparat tilshisi.

Búgingi kezdesýdiń eki qurama úshin mańyzy zor boldy. Jeńgeni aldaǵy jyly da top-dıvızıonda oınaýyna múmkindik alady. Jeńilgeni tómengi dıvızıonǵa túsedi.

Kezdesý barysynda qazaqstandyq hokkeıshilerdiń basymdyǵy baıqaldy. Qazaqstandyq quramadan Kertıs Valk 11-mınýtta esep ashsa, oǵan 14-mınýtta ıtalııalyq Brendon Maknellı bir golmen jaýap qaıyrdy. Birinshi kezeńniń 15-mınýtynda qazaqstandyq Valerıı Orehov esepti ulǵaıta tústi.

Ekinshi kezeńniń 24-mınýtynda Álıhan Ásetov esep aıyrmasyn taǵy bir golǵa ulǵaıtty. Budan keıin ıtalııalyq Dıego Kostner 25-mınýtta gol soǵyp, kezdesýdiń mańyzy arttyrdy.

Úshinshi kezeńde Roman Starchenko 43, Nıkıta Mıhaılıs 46-mınýttarda Qazaqstan quramasynyń basymdyǵyn arttyrdy.

Osylaısha qazaqstandyq hokkeıshiler qarsylasynan 5:2 esebimen basym tústi. Nátıjesinde aldaǵy jyly top-dıvızıonda qalý múmkindigin saqtap qaldy.

Eki qurama buǵan deıin 8 márte kezdesti. Onyń 5-ýi Qazaqstannyń jeńisimen aıaqtalsa, qalǵanynda ıtalııalyq qurama basym tústi.

Eske salsaq, budan buryn qazaqstandyq hokkeıshiler Danııa, Frantsııa, Shveıtsarııa, Kanada, Slovakııa jáne Germanııa quramalarynan jeńildi.