Hokkeıden ÁCh: Qazaqstan jastar quramasynyń qarsylastary anyqtaldy

<p>ASTANA. KAZINFORM - Shaıbaly hokkeıden Qazaqstan jastar quramasynyń álem chempıonaty toptyq kezeńindegi qarsylastary anyqtaldy.&nbsp;</p>

Kanada astanasy Ottava qalasynda 2024 jyldyń 26 jeltoqsany men 2025 jyldyń 5 qańtary aralyǵynda jastar arasynda álem chempıonaty ótedi. Qazaqstandyq hokkeıshiler V tobynda Shvetsııa, Chehııa, Slovakııa jáne Shveıtsarııamen kezdesedi.

Al A tobynda AQSh, Fınlıandııa, Kanada, Latvııa jáne Germanııa oınaıdy.

Atalǵan týrnırdiń pleı-off satysyna árbir toptan tórt komanda joldama alady. Besinshi oryndy mise tutqan quramalar joǵary dıvızıondaǵy ornyn saqtap qalý úshin ózara kezdesedi.
Ótken jyldyń jeltoqsan aıynda elimizdiń jastar quramasy álem chempıonaty IA dıvızıonynda birinshi oryn aldy. Nátıjesinde jastar arasynda álem chempıonaty elıtalyq dıvızıonyna bes jyldan keıin qaıta oraldy.

Elimizdiń 20 jasqa deıingi jastar quramasy sońǵy ret 2020 jyly úzdikter qatarynda synǵa túsken edi.

Eske salsaq, budan buryn shaıbaly hokkeıden Qazaqstan ulttyq quramasynyń 2025 jylǵy álem chempıonaty elıtalyq dıvızıondaǵy qarsylastary anyqtaldy.