HOK Olımpıada oıyndaryn únemshildikpen ótkizýdi usyndy

ASTANA. QazAqparat - Halyqaralyq olımpıada komıteti (HOK) bolashaqta ótkiziletin Olımpıada oıyndarymen baılanysty 118 reformadan turatyn «Jańa norma» jobasyn tanystyrdy.

Bul týraly uıymnyń baspasóz qyzmetine silteme jasap TASS habarlaıdy.

Joba Phenchhan qalasynda ótken HOK-tyń 132-shi sessııasynda tanystyryldy. «Jańa norma» «Olımpıada tártibi - 2020» usynymdaryna sáıkes jasalǵan. Reformanyń kópshiligi qalalar Olımpıada jáne Paralımpıada ótkizý barysynda mıllıondaǵan dollar qarajat únemdep, HOK tarapynan qoldaý tabýǵa baǵyttalǵan.

Tokıoda 2020 jyly ótetin oıyndardyń uıymdastyrýshylary HOK pen birigip jumys jasap nátıjesinde 2,2 mıllıard dollar únemdegen.

HOK málimdegendeı, uıymdastyrýshylar 80 jaǵdaıda qarjy únemdeı alady. Mysal keltiretin bolsaq, olımpıada qalashyǵynyń kólemin kishireıtý, qoǵamdyq kólikter retinde burynnan qalada júrgen kólikterdi paıdalaný. Sonymen qatar HOK bir arenany sporttyń birneshe túrine  paıdalanýdy usyndy.