HQO-lar kópbalaly analardy demalys kúnderi de qabyldaıdy

ÓSKEMEN. QazAqparat - El óńirlerindegi Halyqqa qyzmet kórsetý ortalyqtary aldaǵy senbi jáne jeksenbi kúnderi demalyssyz jumys isteıtin bolady. Bul týraly Іshki ister mınıstrliginiń baspasóz qyzmetinen málim etti, dep habarlaıdy QazAqparat tilshisi.

Kópbalaly jáne az qamtylǵan otbasylarǵa arnalǵan arnaıy kómekti alý úshin jer-jerde tirkelý júrip jatqany belgili.

«Halyqqa qyzmet kórsetý ortalyqtaryna ótinishpen kep jatqandardyń legi kóp bolýyna baılanysty qujattardy qabyldaý jáne tirkeý 1 sáýirge deıin aldaǵy demalys kúnderi de júzege asyrylady. Sondaı-aq uzyn-sonar kezek qalyptaspaý úshin jer-jerdegi HQO-larda mıgratsııalyq qyzmet ókilderiniń sany kóbeıtildi. Turǵylyqty jerge tirkelý jáne jeke kýálikterdi rásimdeý boıynsha azamattardan qujattardy qabyldaý kún saıyn 9.00 den 20.00-ge deıin júrgiziledi» - delingen mınıstrliktiń baspasóz qyzmeti usynǵan aqparatta.

Aıta keteıik, Elbasy bıyl «Nur Otan» partııasynyń XVIII sezinde áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeıtýdi tapsyrdy.

Keıin, áleýmettik saıasatty júzege asyrý máselelerine arnalǵan keńes barysynda N.Nazarbaev tabysy az azamattar men kópbalaly otbasylar áleýmettik kómekti 1 sáýirden bastap alýy tıistigin atap ótti.

«Kómekke asa muqtaj tabysy az azamattar, kópbalaly otbasylar bıylǵy 1 sáýirden bastap áleýmettik kómekti alýy tıis» - degen bolatyn Nursultan Nazarbaev atalmysh keńeste.