HQO-lar azamattardy tek aldyn ala jasalǵan bron negizinde qabyldaıdy

NUR-SULTAN. QazAqparat - HQO-larǵa tek aldyn ala bronmen barýǵa bolady, dep habarlaıdy QazAqparat - «Azamattarǵa arnalǵan úkimet» memlekettik korporatsııasyna silteme jasap.

«Azamattardyń kóptep jınalýyn jáne vırýsty juqtyrý qaýpin boldyrmaý maqsatynda keıbir óńirlerdegi HQO-lar azamattardy qatań túrde tek aldyn jasalǵan bron negizinde qabyldaıdy. Epıdemıologııalyq jaǵdaıdyń nasharlaýyna baılanysty óńirlerdiń bas sanıtarlyq dárigerleri Nur-Sultan, Atyraý, Qostanaı, Rýdnyı, Tobyl, Taldyqorǵan, Shymkent, Temirtaý, Óskemen jáne Semeı qalalarynyń HQO-larynyń jumysy boıynsha arnaıy sheshim shyǵardy. Endi kelýshilerdi qabyldaý tek aldyn ala jazylý arqyly júzege asyrylady», delingen habarlamada.

Baspasóz qyzmetiniń málimetinshe, bul ózgerister aýyldy jerler men aýdan ortalyqtarynyń HQO-larynyń jumysyna qatysy joq.
HQO ǵımaratynda qatań túrde betperde taǵý tártibin saqtaý qajet. Qashyqtyqty saqtaý úshin arasy 1,5-2 metr bolatyn belgi syzylǵan. Árbir HQO-da sanıtaızerler bar.
«Brondaýǵa ótinim qaldyrý úshin azamattar egov.kz elektrondy úkimet portalyn, eGovKzBot2.0. Telegram botyn paıdalanady nemese 1414 nómirine qońyraý shala alady. Brondaý rásiminen keıin azamatqa HQO-ǵa barý ýaqyty týraly tıisti SMS habarlama joldanady.
«Bizdiń áriptesterimiz front ofısterde qyzmet alýshylarmen tikeleı baılanysta. Biz kelýshiler men qyzmetkerlerdiń qaýipsizdigin barynsha qamtamasyz etýge tyrysamyz. Sondyqtan qyzmet alýshylarǵa qandaıda aýrý belgileri baıqalsa, HQO-ǵa barýdan bas tartýǵa keńes beremiz», – deıdi memlekettik korporatsııanyń tóraǵasy Ádil Qojyqov.