«HQKO» RMK bas dırektory taǵaıyndaldy

ASTANA. QazAqparat - QR Investıtsııalar jáne damý mınıstri A. Isekeshevtiń buıryǵymen QR Investıtsııalar jáne damý mınıstrligi «Halyqqa qyzmet kórsetý ortalyǵy» RMK-nyń bas dırektory bolyp Ásemgúl Serikqyzy Baltasheva taǵaıyndaldy, dep habarlaıdy vedomstvonyń baspasóz qyzmetinen.

Ásemgúl Baltasheva S.Toraıǵyrov atyndaǵy Pavlodar memlekettik ýnıversıtetin «Býhgalter-aýdıtor» mamandyǵy boıynsha jáne Qaraǵandy memlekettik tehnıkalyq ýnıversıtetin «Ekonomıka-Zańtaný» mamandyǵy boıynsha bitirgen.

Taǵaıyndalǵanǵa deıin «HQKO» RMK bas dırektorynyń qyzmetterdi avtomattandyrý jáne HQKO qyzmetin uıymdastyrý jónindegi orynbasary, «HQKO» RMK Pavlodar oblysy boıynsha fılıalynyń dırektory bolyp jumys atqardy.

1997-2011 jyldar aralyǵynda «Qazaqtelekom» AQ Pavlodar oblystyq telekommýnıkatsııalar dırektsııasynda túrli laýazymdarda jumys jasaǵan.

2013 jylǵy jeltoqsanda Qazaqstan Respýblıkasy Prezıdentiniń Jarlyǵymen memlekettik jáne qoǵamdyq qyzmettegi jetistikteri, elimizdiń áleýmettik-ekonomıkalyq jáne mádenı damýyna qosqan eleýli úlesi, halyqtar arasyndaǵy dostyq pen yntymaqtastyqty nyǵaıtqany úshin QR Qurmet gramotasymen marapattaldy.