HQKO-na Telegram arqyly kezekke turýǵa bolady

ASTANA. QazAqparat - Azamattarǵa arnalǵan úkimettiń Telegram-bot arqyly taǵy úsh qyzmeti qoljetimdi boldy. Bul týraly «Ulttyq aqparattyq tehnologııalar» AQ Basqarma tóraǵasy Áset Turysov aıtty, dep habarlaıdy QazAqparat tilshisi. 

«Ulttyq aqparattyq tehnologııalar» AQ men QR Ádilet mınıstrligi @EgovKzBot Telegram-botynda jańa úsh qyzmettiń iske qosylǵany týraly habarlady.

Endi Telegram kómegimen azamattar kelesi qyzmetterdi surata alady:

- «Azamattarǵa arnalǵan úkimet» MK» KEAQ Halyqqa qyzmet kórsetý ortalyqtaryna kezek brondaý;
- «Tirkelgen zańdy tulǵa, fılıal nemese ókildik týraly» anyqtama berý;
- «Zańdy tulǵanyń fılıaldary men ókildikteriniń bar ekendigi týraly» anyqtama berý.

Áset Turysov atap ótkendeı, osymen @EgovKzBot Telegram-bot arqyly qoljetimdi qyzmetterdiń sany 13-ke jetti. Bot arqyly paıdalanýshylar: mekenjaı, jyljymaıtyn múliktiń bar-joqtyǵy, sottalǵan-sottalmaǵany, jeke tulǵanyń basqa zańdy tulǵalarǵa qatysýy, jyljymaıtyn múlikke tirkelgen quqyqtar (aýyrtpalyqtar), tirkelgen zańdy tulǵa, fılıal nemese ókildik, zańdy tulǵanyń fılıaldary men ókildikteriniń bar-joqtyǵy týraly anyqtamalardy surata alady.

Odan basqa, paıdalanýshylarǵa mynadaı múmkindikter berilgen: Áleýmettik mártebesin tekserý, bazalyq zeınetaqy tóleminiń mólsheri týraly aqparatpen tanysý, emhanaǵa tirkelý, dáriger qabyldaýyna jazylý, dárigerdi úıge shaqyrý jáne Halyqqa qyzmet kórsetý ortalyqtaryna kezek brondaý.

«@EgovKzBot iske qosylǵan sátten bastap (21 mamyrdan beri) 11 myńnan astam jazylyp, dál sonsha qyzmetterge suraý salǵan. @EgovKzBot arqyly kórsetiletin qyzmetterdiń sany budan ári kóbeıedi. Barlyq tanymal qyzmetterdi osy platformaǵa kóshirýdi josparlap otyrmyz. eGov.kz portalynyń belsendi paıdalanýshylary men basqa da azamattardy bot múmkinderin qoldanýǵa shaqyramyn. Óıtkeni, shynymen de ońaı ári tez», - dep atap ótti «Ulttyq aqparattyq tehnologııalar» AQ Basqarma tóraǵasy Áset Turysov Facebook-te.