HQKO qyzmetkerleri memlekettik qyzmetterdi qoǵamdyq oryndarda kórsetetin bolady
«Azamattarǵa arnalǵan úkimet» memlekettik korporatsııasy» KEAQ-tyń BQO boıynsha fılıalynyń baspasóz qyzmetinen málim etkenindeı, Qazaqstannyń 20 oblysynda azamattar memlekettik qyzmetterdi óz betinshe ala alatyn 29 connection point ashyldy.
Ózine-ózi qyzmet kórsetý aımaqtary saýda ortalyqtary, bazarlar, avtovokzaldar jáne bankter sııaqty qoǵamdyq oryndarda ornalasqan. Sonyń ishinde Batys Qazaqstan oblystyq fılıalynda tómendegi mekenjaılar boıynsha azamattar memlekettik qyzmetterdi óz betinshe alatyn 2 connection point ashyldy: Oral qalasy, Qurmanǵazy kóshesi, 173/1 «Dom Byta» saýda úıi; Oral qalasy, Isaev kóshesi, 2/9 «Moskovskıı» saýda úıi.
Connection point azamattarǵa elektrondyq úkimet portaly arqyly qyzmetterdi óz betinshe alýǵa kómektesedi. Munda klıentter elektrondy qoltańba alý, turǵylyqty jeri boıynsha tirkelý, zeınetaqy jınaqtary týraly anyqtama alý jáne basqa tanymal qyzmetterge tapsyrys bere alady.
«Ótken jyly qazaqstandyqtar HQKO-daǵy ózine-ózi qyzmet kórsetý sektorlarynda 15 mıllıonnan astam qyzmet alǵan bolatyn. Biz iri qalalar men oblys ortalyqtarynda connection point ornatý arqyly jobany aýqymdy etýdi uıǵardyq. Biz saýda ortalyqtaryn, bazarlardy, avtovokzaldardy kezdeısoq tańdaǵan joqpyz, ol jaqtarda adam legi kóp jáne azamattarǵa memlekettik qyzmet kórsetý úshin bizdiń qyzmetkerlerge júginý yńǵaıly bolady», - dedi memlekettik korporatsııanyń basqarma tóraǵasy Arman Kenjeǵalıev.
Aıta ketý kerek, búginge deıin saýda ortalyqtary men bazarlardaǵy ózine-ózi qyzmet kórsetý sektorlary arqyly 2 myńnan astam qyzmet kórsetildi. Qańtar aıyndaǵy eń tanymal qyzmetterdiń biri azamattyq hal aktileri týraly málimetterdi túzetýge ótinish berý boldy. Azamattar «Ulttyq qor - balalarǵa» baǵdarlamasyna qatysý úshin balalar týraly málimetterdi qosýǵa ótinish bergen.