HQKO-dan daıyn qujattardy úıge jetkizý qyzmeti iske qosyldy

ASTANA. QazAqparat - «Azamattarǵa arnalǵan úkimet» memlekettik korporatsııasy «Qazposhta» AQ-men birlesip daıyn qujattardy úıge jetkizý qyzmetin iske qosýda. Endi qazaqstandyqtardyń daıyn qujattardy alý úshin halyqqa qyzmet kórsetý ortalyqtaryna barýdyń qajeti joq, kýrer ony kez kelgen mekenjaıǵa jetkizip beredi, dep habarlaıdy QazAqparat tilshisi «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamy baspasóz qyzmetine silteme jasap.

«Bul servısti paıdalaný úshin klıent qyzmet alýǵa qajetti tolyq qujattar paketin HQKO ınspektoryna ótkizedi jáne daıyn qujattardy jetkizip berý jónindegi ótinimdi toltyrý úshin HQKO ǵımaratynda ornalasqan «Qazposhta» AQ qyzmetkerlerine júginedi. Qujattardy jetkizip berý qyzmeti jeke jáne zańdy tulǵalarǵa kommertsııalyq negizde kórsetiledi. Úıge jetkizip berý baǵasy qyzmet kórsetiletin aımaqqa jáne sońǵy jetkizilim mekenjaıyna baılanysty bolady. Jetkizilim jaıly aqparatty berilgen trek-nómiri boıynsha post.kz. saıtynan qadaǵalap otyrýǵa bolady. Qyzmettiń eń tómengi quny - 500 teńge. Qyzmet alýshy qyzmet aqysyn daıyn qujattardy alǵannan keıin tóleıdi», - delingen resmı habarlamada.

«Azamattarǵa arnalǵan úkimet» memlekettik korporatsııasy» AQ basqarma tóraǵasy Abylaıhan Ospanovtyń aıtýynsha, jańa qyzmet HQKO-ǵa kelýge ýaqyty tapshy azamattarǵa arnalǵan.

«Qazirgi ýaqytta qyzmetterdi avtomattandyrý jumystary belsendi túrde júrip jatyr. Kóptegen qazaqstandyqtar qyzmetti elektrondyq úkimet portalynyń kómegi arqyly úıden shyqpaı-aq alady. Alaıda, HQKO-ǵa kelmeı rásimdeýge bolmaıtyn qyzmet túrleri de bar. Sońǵy ýaqytta qyzmetti úıde otyryp alýǵa ótinish bildirgen azamattardyń qatarynyń ósýine baılanysty, bizdiń qyzmet alýshylarymyzǵa yńǵaıly bolý úshin osy servısti iske qosýdy sheshtik» - deıdi Ospanov.

Memlekettik korporatsııa aldaǵy ýaqytta ınternet, telefon, uıaly baılanys jáne taǵy basqa arnalar arqyly birneshe servıster men jobalardy engizýdi josparlap otyr.