Hıdjap taqqan 2 oqýshy sabaqqa kelmeı júr – Aqtóbe oblysynyń ákimi

NUR-SULTAN. QazAqparat – Búgin Ortalyq kommýnıkatsııalar qyzmetinde ótken baspasóz máslıhatynda Aqtóbe oblysynyń ákimi Ońdasyn Orazalın hıdjap taqqan 2 qyzdyń sabaqqa kelmeı otyrǵanyn aıtty, dep habarlaıdy QazAqparat tilshisi.

«Byltyr 7 qyz bala osy jaǵdaıǵa baılanysty oqý jylynyń ishinde mektepke kelgen joq. Bıyl nebári eki qyz bala. Meniń oıymsha, bul jerde qyzdarǵa arnalǵan jeke mekteptiń ashylýy, ekinshi jaǵynan túsindirý jumystary oń áser etti. Menińshe, osy salada órship bara jatqan úlken problema joq», - dedi ol BAQ ókilderiniń saýalyna oraı .

Osy rette oblys basshysy zaıyrly memleket bolǵan soń balalardy tıisti bilimmen qamtamasyz etý qajettigin basa aıtty.

«Soǵan baılanysty mektepte qoldanylatyn erejelerdi saqtaýymyz kerek. Jalpy osy máselege baılanysty ata-analarda túsinik bar. Qazirgi tańda olardyń sany edáýir azaıdy. Meniń oıymsha, bolashaqta bul úlken problemaǵa aınalmaýy tıis», - deıdi Ońdasyn Orazalın.