Hıdjabqa baılanysty mektepke barmaı júrgen oqýshylar bar ma – mınıstr jaýaby

<p>Oqý-aǵartý mınıstri Ǵanı Beısembaev hıdjab kııýine baılanysty sabaqqa barmaı júrgen oqýshy qyzdar týraly saýalǵa jaýap berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.&nbsp;</p>

Búgin Úkimet otyrysynan keıingi brıfıngte BAQ ókilderi mınıstrden «Atyraý oblysynda 150 qyzdyń mektepke barmaı júrgeni týraly naqty aqparat bar. Óıtkeni, olar hıdjabpen júredi, kirgizbeıdi. Ózge óńirler boıynsha aqparat bar ma?» dep suraǵan edi.

Ǵanı Beısembaev jańa oqý jyly bastalǵan kezde hıdjap kıgen oqýshy qyzdardyń sany 150-den de kóp bolǵanyn jasyrǵan joq.

Degenmen, olardyń ata-anasymen túsindirý jumysy júrgizilgenin atap ótti.

«Mektep balalardyń sapaly bilim men tárbıe alýǵa arnalǵanyn jaqsy bilesizder. Sondyqtan ata-analar túsinip, qabyldaı bastady. Qazirgi ýaqytta bul másele sheshildi. Mendegi aqparatqa sáıkes, basqa óńirlerde oramal taǵatyn oqýshylar joq», — dedi mınıstr.

Osy rette BAQ ókilderi elimizde mektepke hıdjabpen baryp júrgen bir de bir oqýshynyń joqtyǵyn taǵy da naqtylap surady.

«Basynda problema boldy. Búginde másele tolyǵymen sheshildi. Ata-analar mekteptiń eń birinshi mindeti — sapaly bilim men tárbıe berý ekendigin túsine bastady. Bir-birin shatastyryp almaýǵa tıispiz», — dedi Ǵanı Beısembaev.