Hıdjab kııýge tyıym salý adamnyń quqyǵyn buzbaı ma - Ádilet vıtse-mınıstri túsindirdi

<p>Ádilet vıtse-mınıstri Alma Muqanova qoǵamda talqylanyp jatqan hıdjab máselesine túsinik berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Bul máselege qatysty qoǵamda biraz pikirtalas júrip jatyr. Tipti halyqaralyq tájirıbege nazar aýdarsańyz, álem elderinde de osyndaı jaǵdaı. Oǵan tyıym salǵan elder de, ruqsat bergender de bar. Kórshi turǵan Ózbekstan men Qyrǵyzstannyń tájirıbesin alyp qarasaq ta, bul máseleler qazirdiń ózinde olardyń parlamentinde qyzý talqylanyp jatyr. Qatelespesem, keı kórshiler bul tyıymdy zańdastyryp qoıǵan», - dedi A. Muqanova Kazinform tilshisiniń suraǵyna jaýap bere otyryp.

Bul turǵyda ol elimizde din ustaný quqyǵyna eshqandaı shekteý joq ekenin, ıaǵnı osy baǵytta konstıtýtsııalyq quqyq bar ekenin aıtty.

Degenmen, qoǵamdyq qaýipsizdik máselesine qatysty tıisti shekteýler boıynsha birqatar norma engizilýi múmkin.

«Jalpy, osyndaı másele kóterilip, tıisti normalardy qarastyrý usynymy engizilse, biz muny taǵy da zań turǵysynan zerdeleımiz», - dedi vıtse-mınıstr.

Sondaı-aq ol oramal taǵýǵa tyıym salynýyna baılanysty qyzdardyń oqý ornyna barýdan bas tartqany jaıly vıdeorolıkterge pikir bildirdi.

«Jalpy, bul saladaǵy is-qımyldar reglamenttelgen. Bilim berý uıymdarynda tıisti shekteý bar. Osy taqyrypta birqatar laýazymdy adam túsinik bergen», - dedi A. Muqanova.

Aıta keteıik, bıyl tamyz aıynda Oqý-aǵartý mınıstri Ǵanı Beısembaev oqýshylardyń mektepke hıdjabpen kelýine pikir bildirgen edi.

Mádenıet jáne aqparat mınıstri Aıda Balaeva da Facebook paraqshasynda oqýshylardyń mektepke hıdjab kıip barýyna óz oıyn jetkizip, Oqý-aǵartý mınıstriniń sózin qýattaı tústi.