HǴS ekıpajynyń úsh múshesi bar «Soıýz MS-16» kemesi Qazaqstanǵa qondy

JEZQAZǴAN. QazAqparat – Halyqaralyq ǵarysh stantsııasynyń (HǴS) úsh múshesi bar «Soıýz MS-16» basqarylatyn ǵarysh kemesiniń jerge qonýshy apparaty Jezqazǵan qalasynyń ońtústik-shyǵysyna qaraı Qazaqstan dalasyna qondy, dep habarlaıdy QazAqparat Roskosmos baspasóz qyzmetine silteme jasap.

«Roskosmos ǵaryshkerleri Ivan Vagner, Anatolıı Ivanıshın jáne NASA astronavty Krıs Kessıdı bar «Soıýz MS-16» basqarylatyn ǵarysh kemesiniń jerge qonýshy apparaty qazaq dalasyna qondy. Olardyń ushý uzaqtyǵy 196 táýlikti qurady. Ekıpaj jumysy barysynda reseılik ǵylymı baǵdarlama (medıtsına, ǵaryshtyq bıologııa, bıotehnologııa, fızıka-hımııalyq protsester jáne t. b.) boıynsha ǵylymnyń túrli salalarynan ondaǵan eksperımentter júrgizildi»,- dep habarlady Roskosmos baspasóz qyzmeti Facebook-te.

2020 jylǵy 22 qazanda Nur-Cultan ýaqyty boıynsha saǵat 05:32-de Halyqaralyq ǵarysh stantsııasynda túıisken «Soıýz MS-16» basqarylatyn kólik kemesi ekıpajynyń músheleri 08:54:12-de jerge aman-esen oraldy. Jerge jaqyn orbıtadan túsý jáne qoný boıynsha barlyq operatsııalar shtattyq rejımde ótti. Roskosmos ǵaryshkerleri Anatolıı Ivanıshın, Ivan Vagner jáne NASA astronavty Krıstofer Kessıdıdiń densaýlyǵy jaqsy, dep atap ótti Roskosmos.

Eske sala ketsek, Roskosmos YouTube -tegi óziniń arnasynda «Soıýz MS-16» kemesiniń qonǵan sátinen tikeleı translıatsııa júrgizdi.