«Hezbolla» Izraıl soqqysynan baspasóz hatshysynyń qaza tapqanyn rastady

<p>ASTANA. KAZINFORM - Lıvannyń &laquo;Hezbolla&raquo; qarýly toby jeksenbi kúni Izraıldiń Beırýt ortalyǵyndaǵy ǵımaratqa jasaǵan soqqysy saldarynan onyń baspasóz hatshysy ári BAQ-pen baılanys basshysy Mohammad Afıftiń qaza tapqanyn rastady.</p>

Beırýt ortalyǵyndaǵy halyq tyǵyz ornalasqan Ras-án-Nabaa aýdanynda Izraıl áýe kúshteriniń shabýylynan taǵy úsh adam jaraqat aldy.

Izraıl áskeri ádette beıbit turǵyndardy shabýyl aldynda evakýatsııalaý kerektigin eskertedi. Bul joly ǵımaratqa eskertýsiz shabýyl jasaldy. Beırýttiń ońtústik shetindegi Izraıldiń shabýyldary saldarynan bosqynǵa aınalǵan kóptegen lıvandyqtar Ras-án-Nabaa aımaǵyn panalady.

Izraıl aqparat quraldarynyń habarlaýynsha, Afıf Beırýt ortalyǵyndaǵy Sırııanyń Baas partııasynyń shtab-páterine jasalǵan shabýylda qaza tapqan. Lıvandaǵy Baas partııasynyń basshysy Álı Hıdjazı Lıvannyń «Ál-Jadıd» telearnasyna Afıftiń ǵımaratta ekenin aıtqan.

Mohammad Afıf birneshe jyl boıy «Hezbolla» uıymynyń «Ál-Manar» telearnasyn basqarǵan.

Afıf 27 qyrkúıekte Beırýttyń ońtústik mańyndaǵy Izraıl áýe shabýylynda qaza tapqan «Hezbolla» bas hatshysy Hasan Nasrallanyń uzaq ýaqyt BAQ jónindegi keńesshisi bolǵan.

Jeksenbi kúni keshke Izraıl áskeri Afıftiń kózin joıǵany týraly málimdeme jasady. Lıvan Densaýlyq saqtaý mınıstrligi soqqy saldarynan bir adam qaza taýyp, úsh adam jaralanǵanyn habarlady.

Izraıl qorǵanys kúshterinde ony «Hezbolla» uıymynyń basty nasıhatshysy jáne ókili dep atady.

TsAHAL Afıftiń «joǵary laýazymdy tulǵalarmen baılanysta bolǵanyn jáne «Hezbollanyń» Izraılge qarsy lańkestik áreketterin nasıhattaýǵa jáne júzege asyrýǵa tikeleı qatysqanyn» málimdeıdi.

Osyǵan deıin Izraıl áskeri Beırýttiń ortalyq aýdandaryna soqqy bergeni týraly habarladyq.