Hasan Nasrallany jerleý rásimi 4 qazanda ótedi

<p>ASTANA. KAZINFORM &ndash; Lıvandaǵy sheıittik &laquo;Hezbolla&raquo; qozǵalysynyń bas hatshysy Hasan Nasrallany jerleý rásimi juma kúni ótedi. Bul týraly beısenbi kúni Iraktaǵy ıranshyl jasaqpen baılanysy bar <a href="https://t.me/SabrenNews22/124119" target="_blank" rel="noopener">Sabereen News</a>-tiń Telegram arnasy habarlady.</p>

Arnaıy derekkózge silteme jasaǵan qysqa málimdemede Seıed Hasan Nasrallany jerleý juma kúni ótetini habarlanǵan. 

Biraq jerleý rásiminiń orny da, ýaqyty da kórsetilmegen. 

«Hezbolla» uıymynyń bas hatshysy 27 qazanda Lıvan tobynyń ortalyq shtab-páteri ornalasqan Beırýttiń ońtústik shetindegi kúshti áýe shabýyly kezinde qaza tapty. Onymen birge astyrtyn shtabta toptyń basqa da músheleri, sondaı-aq Iran tóńkeris saqshylarynyń generaly qaza tapty.

Hasan Nasralla 64 jasta bolǵan, ol topty 32 jyl boıy basqaryp kelgen. 

«Hezbolla» áli kúnge deıin kóshbasshysynyń jerleý rásimi týraly eshqandaı málimetterdi jarııalaǵan joq.

Birqatar aqparat quraldary jerleý rásimi qaı jerde ótetini týraly boljam aıtty. Lıvannyń LBC radıohabar taratý korporatsııasy rásimniń Beırýttyń ońtústik shetinde, Lıvannyń ońtústiginde nemese Bekaa alqabynda ótkizý nusqasyn boljaıdy. Alaıda, Izraıldiń úzdiksiz soqqylaryn eskere otyryp, bul nusqa qazirgi ýaqytta ekitalaı bolyp kórinedi. 

Sondaı-aq, «Hezbolla» onyń denesin shetelge tasymaldaýy múmkin degen boljam bar, onyń eń yqtımal jeri ımam Hýseın jerlengen Iraktaǵy sheıitterdiń qasıetti qalasy Kerbala bolýy múmkin.

Jeksenbide Irak premer-mınıstri Muhammed Shıa ál-Sýdanıdiń keńesshisi Abdýl Ámir Taıban H áleýmettik jelisinde Nasrallanyń «Irakta onyń atasy Imam Hýseınniń qabiriniń janyna» jerlenetinin jarııalady.