Harkov qalasynda qazaq tili mektebi ashyldy

HARЬKOV. QazAqparat – Qazaqstan Respýblıkasynyń Harkov qalasyndaǵy Qurmetti konsýldyǵynda Qazaqstannyń Ýkraınadaǵy Elshiliginiń kómegimen «Shańyraq» qazaq tilin oqytý mektebi óz qyzmetin bastady. Bul týraly QazAqparat Elshiliktiń baspasóz qyzmetine silteme jasap habarlaıdy.

Mektep oqýshylarynyń arasynda qazaq dıasporasynyń ókilderi, negizinen balalar, jáne Qazaqstanǵa qyzyǵýshylyq tanytyp otyrǵan jergilikti azamattar bar.

Bul rette mundaǵy oqytý ádistemesi tek qazaq tilin oqytýǵa emes, sonymen birge qazaq halqynyń dástúrlerin, mádenıeti men saltyn tanýǵa negizdelgen.

Dıaspora ókilderi osyndaı mekteptiń ashylýyna joǵary baǵasyn berdi, sebebi onyń qyzmeti sheteldegi qazaqtardyń birigýine septigin tıgizip, tarıhı Otanymen baılanysty odan da jaqsy sezinýge, sondaı-aq Ýkraınada Qazaqstan atyn shyǵarýǵa múmkindik beredi.