Hans-Peter Frıdrıh: Qazaqstan turaqtylyqtyń arqasynda qarqyndy serpilis jasady

NUR-SULTAN. QazAqparat - «Nur Otan» partııasy Tóraǵasynyń Birinshi orynbasary Baýyrjan Baıbek Germanııa Federatıvti Respýblıkasy Býndestag tóraǵasynyń orynbasary Hans-Peter Frıdrıhpen kezdesti, dep habarlaıdy QazAqparat tilshisi.

Taraptar ózara partııaaralyq yntymaqtastyqty damytý perspektıvalaryn, «jańa» medıanyń eldegi qoǵamdyq-saıası ahýalǵa yqpalyn, sondaı-aq, «Nur Otan» partııasyn qaıta jandandyrýdaǵy negizgi baǵyttardy talqylady.

Búginde Qazaqstan men Germanııa arasyndaǵy senimdi seriktestiktiń arqasynda saýda-ekonomıkalyq jáne mádenı-gýmanıtarlyq yntymaqtastyq qarqyndy damýda. 2018 jyly eki el arasyndaǵy taýar aınalymy 5,9 paıyzǵa ósip, jańa tarıhı mánge – 5,1 mlrd. eýroǵa jetti. Qazaqstan Germanııanyń Ortalyq Azııadaǵy negizgi seriktesi sanalady. Al ekijaqty saýda-sattyqtyń jalpy kólemi Germanııanyń osy aımaqtaǵy elderimen syrtqy saýda operatsııalarynyń 85 paıyzdan astamyn quraıdy.

«70 jyl boıy Germanııanyń saıası júıesi turaqty boldy. Sonyń arqasynda biz ekonomıkalyq zor tabysqa qol jetkizdik. Degenmen, zaman talaby ózgerýde, qazir bizdiń federaldy jıynymyzda alty fraktsııa bar. Biz saıası turaqtylyqtyń arqasynda Qazaqstannyń 30 jylǵa jýyq ýaqyttyń ishinde myqty serpilis jasaǵanyn kórip otyrmyz. Jurtshylyq turaqtylyqtyń asa úlken qundylyq ekenin túsinýi tıis. Sebebi, ol ekonomıkanyń tiregi. Biz áli de bolsa bul jolǵa qaıta oralamyz dep senemin. Sát saıyn ózgerip jatqan álemde barlyǵymyzdyń aldymyzda jańa synaqtar kezdesetini anyq. Máselen, jańa tehnologııalardyń damýymen qatar, tsıfrlyq saladaǵy zańdylyqtardy saqtaýdy, moral men ádep, dástúrli qundylyqtardy nasıhattaýdy qamtamasyz etý qajet», – dedi Hans-Peter Frıdrıh.

Ortalyq apparattyń baspasóz qyzmeti taratqan aqparatqa sáıkes, «Nur Otan» partııasy Tóraǵasynyń Birinshi orynbasary Baýyrjan Baıbek Germanııanyń Hrıstıan-demokratııalyq odaǵy partııasynyń jáne Qazaqstandaǵy K.Adenaýer atyndaǵy qordyń ókilderimen de kezdesý ótkizgen.

Kezdesý barysynda taraptar partııalyq praımerız rásimin uıymdastyrý jáne ótkizý tártibin talqylady. Bul rásimdi HDO partııaishilik demokratııany qarqyndy damytý úshin saılaý naýqany barysynda qoldanyp keledi. Saılaý naýqany jáne saılaýaralyq kezeńde de partııanyń jańa kóshbasshylaryn anyqtaý máseleleri boıynsha tájirıbe almasty.