Hans Klıýge qazaqstandyq telearnaǵa suhbat berýge nıetti
16:03, 13 Mamyr 2020
NUR-SULTAN. QazAqparat - Dúnıejúzilik densaýlyq saqtaý uıymy Eýropalyq óńirlik bıýrosynyń dırektory Hans Klıýge Qazaqstan telearnalarynyń birine suhbat berýge nıetti. Bul týraly QR DSM Qoǵamdyq densaýlyq saqtaý ulttyq ortalyǵy dırektorynyń orynbasary Serjan Aıdosov aıtty, dep habarlaıdy QazAqparat tilshisi.
«Hans Klıýge óz tarapynan qyzyǵýshylyq tanytyp otyr. Ol «sizderdiń tájirıbelerińizdi qarap, soǵan qatysty ustanymyzdy bildirsek» dep usynys jasady. Osy aptanyń ishinde Dúnıejúzilik densaýlyq saqtaý uıymynyń Qazaqstandaǵy ókildigimen birlese otyryp, Habar-24 nemese basqa respýblıkalyq arnamen kelisimge kelemiz. Ol suhbat berýge daıyn», - dedi Serjan Aıdosov «Densaýlyq saqtaý mınıstrligi habarlaıdy» baǵdarlamasy barysynda.
Esterińizge sala ketsek, Dúnıejúzilik densaýlyq saqtaý uıymy Eýropalyq óńirlik bıýrosynyń dırektory Hans Klıýge Qazaqstannyń koronavırýsqa qarsy kúres sharalaryna joǵary baǵa bergen edi.
«Qazaqstan – COVID19-ǵa qatysty ahýaldy turaqtandyrý boıynsha belsendi kúsh-jigerdiń tamasha úlgisi», - dep jazdy Klıýge Twitter-de.