Hanchjoýda Qazaqstannyń ekonomıkalyq zertteýler ortalyǵy ashyldy

HANChJOÝ. QazAqparat - Chjetszıan ekonomıka jáne qarjy ýnıversıtetinde Qazaqstan ekonomıkalyq zertteýler ortalyǵynyń saltanatty ashylý rásimi boldy, dep habarlaıdy QazAqparat menshikti tilshisi.

Ortalyqty ashýǵa Qazaqstan Respýblıkasynyń Qytaıdaǵy Elshiligi men Shanhaı qalasyndaǵy Bas konsýldyǵy qolǵabys etti. Jańa ortalyqta qytaı stýdentteri men sarapshylary Qazaqstannyń áleýmettik-ekonomıkalyq damýy, tarıhy, mádenıeti jáne dástúrlerimen tanysady.

Sharada sóz sóılegen Qazaqstannyń Qytaıdaǵy Elshisi Shahrat Nuryshev jınalǵandarǵa «Qazaqstan-2050» Strategııasynyń negizgi baǵyttary, QR Prezıdentiniń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýy, «Bolashaqqa baǵdar: Rýhanı jańǵyrý» baǵdarlamasy jáne Qazaqstannyń áleýmettik-ekonomıkalyq jáne saıası damýynyń basqa da mindetteri týraly aıtyp berdi.

Eske sala keteıik, Qazaqstannyń Qytaıdaǵy alǵashqy ortalyǵy Beıjiń shet tilder ýnıversıtetinde 2015 jylǵy 13 jeltoqsanda ashylǵan bolatyn. Keıinnen Shanhaı, Dalıan, Sıan shet tilderi ýnıversıtetterinde de Qazaqstannyń ortalyqtary ashylǵan. Bul jolǵy ortalyq - besinshisi, al ekonomıkalyq baǵyttaǵy alǵashqy ortalyq bolyp otyr.

Ortalyqtyń basty mindetteriniń biri - «Astana» Halyqaralyq qarjy ortalyǵymen seriktestik baılanystardy nyǵaıtý. Hanchjoý Qytaıdyń jańa tehnologııalardy damytý jónindegi iri megapolısteriniń biri ekenin eskersek, tsıfrlyq ekonomıka, blokcheın tehnologııalar, ınnovatsııalyq startaptar jáne elektrondy saýda salalaryndaǵy tájirıbe almasý osy ortalyqtyń enshisinde bolmaq.

Ortalyqtyń ashylýyna oraı, Hanchjoýda Qaraǵandy fılarmonııasy Sımfonııalyq orkestriniń saltanatty kontserti ótti.