Hamenova: Halyqtyń Tuńǵysh Prezıdenti bolý - nardyń beli qaıysar júgin arqalaýmen para-par
«Búgingi álemdik qaýymdastyq Qazaqstandy beıbitshilik saltanat qurǵan, bereke-birlikti tý etken el retinde tanıdy. Ustanǵan saıasatymen sanasady. Bastamalaryn qoldaıdy. Dúnıejúzi elderiniń tarıhyna qaraıtyn bolsaq, táýelsizdigin jarııalaǵan jas memleketter shırek ǵasyr ishinde mundaı dárejege jete alǵany bar ma? Al osyndaı dárejege az ýaqyttyń ishinde qol jetkizý bizdiń elimiz úshin, syndarly sátte el taǵdyryn qolyna alǵan Elbasymyzǵa ońaıǵa soqpaǵany aqıqat. Barsha eldiń, halyqtyń Tuńǵysh Prezıdenti bolý - nardyń beli qaıysar júgin arqalaýmen para-par», - dedi ol.
Májilis depýtatynyń aıtýynsha, buǵan kóshbasshylyq, qaıratkerlik, ultjandylyq, halyqshyldyq, dara bolmys, kemel aqyl men tereń bilim, ómirlik baı tájirıbe, týabitti saıası danalyq kerek.
«Bul turǵyda jurtymyzdyń baǵy jandy, asyǵy alshysynan tústi. Syn sátte qazaq jurtynyń tizginin qolyna alǵan Tuńǵysh Prezıdentimiz babalar amanatyna adaldyq tanytyp, elimizdiń abyroı-bedelin buryn-sońdy bolmaǵan bıikke kóterdi. Bıylǵy jylǵy Elbasynyń Bılik tarmaqtary arasyndaǵy ókilettilikterdi qaıta bólý jónindegi úndeýi - sózimizdiń dáleli. Elbasymyz osy úndeýi arqyly Qazaqstan Respýblıkasynyń tarıhyndaǵy damýdyń jańa kezeńin taǵy da aıqyndap berdi. Táýelsizdiktiń tańy atqaly qazaq jurtynyń shańyraǵyn shaıqaltpaı, el eńsesin tikteýdi ǵana oılaǵan Elbasy basqa bılik tarmaqtaryna óziniń 60-qa jýyq ókilettiligin berý týraly sheshim shyǵardy», - dedi Hamenova.
Onyń atap ótýinshe, buǵan deıin bılikti tóbe bılerimen bóliske salyp, el taǵdyry úshin dara da dana joldy tańdaý, ǵasyrlyq sheshim qabyldaý buryn-sońdy qazaq ǵumyrnamasynda bolmaǵan teńdessiz aqıqat.
«Bul parasatty sheshim - ýaqyttyń ózi ekshegen, eline degen senimnen týǵan ádiletti sheshim. «Men ne istesem de, qabyrǵaly halqyma arqa súıep istedim», -degen Nursultan Ábishulynyń salıqaly sózi bar. Elbasynyń 26-bap týraly sheshimi osy oramdy oıdyń naqty dáleli», - dedi Májilis depýtaty.
Aıta keteıik, birlesken otyrys barysynda «Qazaqstan Respýblıkasy Konstıtýtsııasyna ózgertýler men tolyqtyrýlar engizý týraly» QR zańynyń jobasy birinshi oqylymda talqylanýda.