HAMAS-tyń jańa basshysy Izraılmen bitimge kelgisi keledi

<p>ASTANA. KAZINFORM &ndash; HAMAS-tyń jańa basshysy Izraılmen bitimge kelgisi keledi. Bul týraly <a href="https://edition.cnn.com/2024/08/11/middleeast/hamas-sinwar-ceasefire-netanyahu-intl/index.html" target="_blank" rel="noopener">CNN</a> jazdy.</p>

HAMAS qozǵalysy saıası bıýrosynyń burynǵy basshysy Ismaıl Hanııa óltirilgennen keıin onyń ornyna saılanǵan ıAhıa Sınvar Mysyr men Katardyń arashashylary arqyly Izraılge beıbitshilikti qalaıtynyn jetkizgen.

CNN-niń Izraıldegi eki derekkóziniń habarlaýynsha, premer-mınıstr Bınıamın Netanıahý kelisimge daıyn. Biraq Izraıl qaýipsizdik sheneýnikteri koalıtsııadaǵy keıbir ońshyl mınıstrlerdiń qarsylyǵyn eskere otyryp, Netanıahýdyń maquldaýyna kúmánmen qaraıdy.

Qarjy mınıstri Betsalel Smotrıch kelisimge qarsylyq bildirgenderdiń biri bolyp, ony «jeńilis» dep atady. Ulttyq qaýipsizdik mınıstri Itamar Ben-Gvır de qarsylyq bildirgen.

AQSh sheneýnikteri Izraıl basshylyǵyna aımaqtyq soǵystyń aldyn alý úshin atysty toqtatý týraly kelisimge qol jetkizý kerektigin aıtqan.

Aıta keteıik, HAMAS saıası bıýrosynyń basshysy Ismaıl Hanııa 31 shildege qaraǵan túni Tegerandaǵy qonaqúıde jarylys bolyp, qaza tapty. Izraıl úkimeti resmı túrde Hanııanyń ólimine jaýapkershilikti moınyna alǵan joq.

Hanııanyń óliminen keıin Iran Izraılge «shekten shyqqanyn» aıtyp, «tez ári qatal» jaýap berýge ýáde berdi.

Sonymen birge AQSh, Mysyr jáne Katar birlesken málimdemede HAMAS pen Izraıldi tez arada atysty toqtatýǵa jáne ızraıldik kepilge alynǵandardy bosatý týraly kelisimge kelýge shaqyrdy. Medıatorlar taraptar kelissózderdi 15 tamyzda ótkizedi dep otyr. Izraıl kezdesýge kelisti, biraq HAMAS áli jaýap bergen joq.