HAMAS-pen kepilge alynǵan 50 adamdy bosatý týraly kelissóz sátsiz aıaqtaldy

<p>AQSh, Izraıl jáne Katardyń palestınalyq HAMAS radıkaldyq qozǵalysymen kepilge alynǵan 50 adamdy bosatý týraly kelissózi sátsiz aıaqtaldy. Bul jaıly juma kúni Wall Street Journal basylymy aqparat kózderine silteme jasap málim etti. <a href="https://kaz.inform.kz/" target="_blank" rel="noopener">Kazinform</a> bul týraly <a href="https://tass.ru/mezhdunarodnaya-panorama/19080001" target="_blank" rel="noopener">TASS </a>agenttigine silteme jasap habarlaıdy.&nbsp;</p>

Olardyń aıtýynsha, kelisimshart ishinde atysty ýaqytsha toqtatý, Izraıldiń Gaza sektoryna sý berýdi qaıta bastaý jáne anklavqa gýmanıtarlyq kómek jetkizýdi jandandyrý máselesi talqylanǵan.

Basylym bul máseleni sodyrlarmen talqylaý qıyn ekenin atap ótti. Qaqtyǵys órshigennen keıingi birinshi aptada radıkaldyq qozǵalys ózderi tutqyndaǵan beıbit turǵyndardyń taǵdyry týraly kelissózderge kirispedi. Sonymen qatar barlyq tutqynnyń naqty ornalasqan jeri tipti Hamasqa da belgisiz.

Buǵan deıin AQSh Memlekettik hatshysy Entonı Blınken Vashıngton HAMAS-tan barlyq kepilge alynǵan adamdy eshqandaı shartsyz bosatýdy talap etetinin aıtqan. Ol sondaı-aq kópjaqty yntymaqtastyqtyń mańyzyn atap ótip, eger bul HAMAS tutqynynda bolǵan adamdardy qaıtarýǵa yqpal etetin bolsa, Vashıngton birlesip jumys isteýge daıyn ekenin jetkizdi.

Izraıl áskerıleriniń málimeti boıynsha, Gaza sektorynda HAMAS ustaǵan, kepilge alynǵandardyń rastalǵan sany eki tutqyn bosatylǵanǵa deıin 203 bolǵan.