«Halyqtyń súıiktisi» syılyǵyna kandıdattar usyný bastaldy

NUR-SULTAN. QazAqparat – «Halyqtyń súıiktisi» ulttyq syılyǵynyń XI maýsymy bastaldy, dep habarlaıdy QazAqparat tilshisi.

Bıyl ulttyq syılyq mynadaı nomınatsııalar boıynsha beriledi:

1. Úzdik pedagog,

2. Úzdik dáriger,

3. Úzdik er sportshy,

4. Úzdik áıel sportshy,

5. Jyl parlamentarıi,

6. Úzdik telejúrgizýshi,

7. Úzdik pýblıtsıst,

8. Jyl mádenıet qaıratkeri,

9. Úzdik aqparattyq ınternet-basylym,

10. Blogosfera kóshbasshysy

6 qazanda bastalǵan daýys berý kezeńi Facebook áleýmettik jelisinde 13 qazanǵa deıin jalǵaspaq.

«Áleýmettik jelini paıdalanýshylar topqa úmitkerdiń aty-jónimen túsinikteme, onyń bir jyldaǵy jetistikteri týraly shaǵyn anyqtama bere otyryp, úmitkerlerdi usyna alady. Sodan keıin syılyqtyń qazylar alqasy 20-30 qazan aralyǵynda syılyqtyń resmı tobynda ótetin daýys berýdiń birinshi kezeńine (long-list) kiretin 5+5 júıesi boıynsha (paıdalanýshylardan bes úmitker jáne qazylar alqasynan bes úmitker) 10 úmitkerdi anyqtaıdy. Osydan keıin úzdik 4 úmitker daýys berýdiń sońǵy týryna shyǵady. Ol kezeń lubimec.kz saıtynda ótedi», - dep jazylǵan baıqaý týraly habarlamada.

Uıymdastyrýshylarydń aıtýynsha, negizgi nomınatsııalardan bólek jyl metsenaty, jyl kásipkeri, jyl fermeri, jyldyń úzdik áleýmettik bıznesi, jyldyń úzdik máslıhat depýtaty sııaqty atalymdar boıynsha úzdikter anyqtalady. Ataýly syılyqtardyń ishinde qoǵam qaıratkeri Saltanat Rahymbekova atyndaǵy «Jasyl ekonomıka úshin» syılyǵy da bar.

Eske salsaq, QazAqparat «Halyq súıiktisi-2018» syılyǵyn «Jyldyń úzdik aqparattyq ınternet basylymy» nomınatsııasy boıynsha jeńip aldy.