«Halyqtyń súıiktisi-2019» syılyǵyna úmitkerlerdi usyný bastaldy
«Respýblıka-Aımaq-Damý» qoǵamdyq qorynyń prezıdenti Ǵalym Baıtoq QazAqparat tilshisine habarlaǵandaı, syılyqtyń bıylǵy nusqasynda birqatar ózgeris bar. Atap aıtqanda, buryn nomınatsııaǵa ıe bolǵan adamdy úmitker retinde bıyl qaıta usynýǵa bolady. Sonymen birge, «Úzdik trevel-bloger» jańa atalym qosylyp otyr. Ol saıahattar men týrıstik is-sharalardy nasıhattaıtyn blogerlerge beriledi.
Osymen toǵyzynshy jyl berilgeli otyrǵan syılyqtyń nomınatsııalar tizimi mynadaı: «Jyldyń úzdik muǵalimi», «Jyldyń úzdik dárigeri», «Jyldyń úzdik sportshysy», «Jyldyń úzdik parlamentarııi», «Jyldyń úzdik telejúrgizýshisi», «Jyldyń úzdik pýblıtsısi», «Jyldyń úzdik mádenıet qaıratkeri», «Jyldyń úzdik aqparattyq ınternet-basylymy», «Blog salasynyń kóshbasshysy», «Jyldyń úzdik trevel-blogeri», «Jyldyń úzdik fermeri», «Jyldyń úzdik kásipkeri», «Jyldyń úzdik áleýmettik belsendisi», «Jyldyń úzdik vaıneri».
Búgin saǵat 22.00-de «Halyqtyń súıiktisi» syılyǵynyń Facebook-tegi resmı paraqshasynda, aldyn ala kezeń – úmitkerlerdi usyný jumysy bastalyp, usynystardy qabyldaý 13 qazanǵa deıin jalǵasady.
Úmitkerlerdi áleýmettik jeliniń qoldanýshylary usyna alady. Nomınanttar aıqyndalǵannan keıin «Halyqtyń súıiktisi» syılyǵynyń Facebook-tegi paraqshasynda 21-30 qazan aralyǵynda daýys berýdiń alǵashqy kezeńi ótedi.
Eske sala ketsek, «Halyqtyń súıiktisi-2018» júldesine ıe bolǵan jeńimpazdar bıylǵy qańtarda marapattalǵan bolatyn. «Jyldyń úzdik aqparattyq ınternet-basylymy» nomınatsııasyn «QazAqparat» Halyqaralyq aqparat agenttigi jeńip alǵan edi.