Halyqtyń rýhanı ahýalyn balalar ádebıetiniń damýymen ólsheý kerek - Nurtóre Júsip
«Prezıdent Qasym-Jomart Kemeluly «otbasynda ana tilinde sóılep ósken búldirshinniń tilge degen yqylasy tereń, qurmeti bıik bolady», -deı kelip, osy turǵyda, balabaqshalarda, mektepterde memlekettik tildiń mártebesin kóterýdi nazarda ustaý qajettigin atap kórsetti.
Ádebıet – adam janynyń aınasy. Balalar ádebıeti - ulttyq mádenıettiń negizin saqtaýdyń, ana tiliniń baılyǵyn arttyrýdyń, sóıleý mádenıetin qalyptastyrýdyń eń qýatty mehanızmi. Balalar ádebıetine ólsheýsiz úles qosqan klassık jazýshylardyń kóbisi ómirden ótti. Kezek – jas tolqynǵa keldi», - dedi senator Nurtóre Júsip Senattyń jalpy otyrysynda.
Osy oraıda depýtat Qazaqstanda mektep jasyna deıingi úsh jasar baladan bastap, on alty jasqa deıingi oqýshylarǵa kórkem ádebı tilde jazylǵan tartymdy týyndylar jetispeıtinin atap ótti.
«Baýyrjan Momyshulynyń «Ertegisiz ósken bala rýhanı múgedek adam»,- degen qanatty sózi bar. Gúlge sý quımasa – solyp qalady. Óspeıdi.
Balalar ádebıeti de sol gúl sııaqty. Bul salaǵa qomaqty qarjy quıylmasa, eshkim jóndep aınalyspaıtyn bolady. Kembrıdj tásili boıynsha, 1-synypqa kirgen oqýshynyń sózdik qory úsh myń sózge jetýi kerek. Ata-anasy kúni boıy jumysta, sábı kezinde ertegi tyńdamaǵan, taqpaq jattamaǵan balada sózdik qor qaıdan bolsyn? Gorkııdiń «balalar jazýshysy ózge jazýshylardan da sapaly jazýy kerek» deıtin sózi bar.
Kishkentaılar úshin shyǵarma jazý ońaı emes. Ǵalymdardyń zertteýine qaraǵanda, ár bir on jyldyqta dúnıege kelgen sábı, bala psıhologııasy bir-birinen múldem alshaq bolady eken. Balanyń janyn túsinbeı, jaqsy týyndy shyqpaıdy», - dedi senator.
Onyń paıymynsha, sondyqtan halyqtyń rýhanı ahýalyn balalar ádebıetiniń damýymen ólsheý kerek. Balalar ádebıeti durys órken jaıǵanda ǵana memlekettik tildiń tuǵyry berik bolady.
«Shyǵatyn kitaptardyń ishinde balalar ádebıetiniń úles salmaǵy óte tómen. Taralymy da, sapalyq jaǵy da kóńil kónshitpeıdi. Keıbir avtorlar kitaptardy óz qarajatyna shyǵarady. Qazir álemde polıgrafııa jaqsy damyǵan, dızaın men grafıkanyń ýaqyty. Qazaqstandaǵy baspalar jumysy halyqaralyq standarttarǵa saı kelmeıdi. Halyqaralyq tájirıbelerge súıený kerek. Shetelde avtor, ıllıýstrator, baspager, ádebı agent – tutas shyǵarmashylyq top kúsh biriktiredi. Bul rette bizge alysqa barmaı-aq, Reseı tájirıbesinen úırenýge bolady», - dedi depýtat.
Bul turǵyda N. Júsip birqatar usynystar jarııalady.
«Tıisti baǵdarlamalar aıasynda balalar ádebıetin damytýǵa arnaıy qarjy bólýdi usynamyz. Balalarǵa arnalǵan kitaptardy basyp shyǵarýǵa jeńildik berý úshin qosylǵan qun salyǵynan bosatý qajet. Ulttyq mýltfılmder shyǵarý isinde jekemenshik kompanııalardy qarjylaı qoldaý tetikterin qarastyrý mańyzdy. Jergilikti ákimshilikter tarapynan kitaphanalardy «Balalar ádebıeti» baǵdarlamasyn jasap, shyqqan jańa kitaptarmen tolyqtyrsa deımiz. Jasóspirimderdiń kitap oqýǵa degen qyzyǵýshylyǵyn arttyrý úshin elektrondy oqýlyqtardy engizý qajet. Mundaı kitaptar qoldanýǵa óte tıimdi, barynsha yńǵaıly, qazirgi zaman talabyna saı bolǵany jón. Sondyqtan, Úkimet qazaq balalar ádebıetin damytýdyń keshendi baǵdarlamasyn jasap, atalǵan sharalardy qolǵa alýy kerek dep esepteımiz», - dedi senator.