Halyqtyń qoldaýy memleket basqarý isin tabysty júrgizýime yqpal etti - Prezıdent

NUR-SULTAN. QazAqparat – Respýblıkalyq «Ana tili» basylymyna bergen suhbatynda Memleket basshysy Qasym-Jomart Toqaev halyqtyń qoldaýyn árdaıym sezinip otyrǵanyn málim etti, dep habarlaıdy QazAqparat tilshisi.

«Barshańyzǵa málim, Qazaqstan Prezıdenti qyzmetin atqarǵan bir jyl ońaı bolǵan joq. Atalǵan merzimdi asa kúrdeli synaqtardy eńsergen jyl dep aıtýǵa bolady. Degenmen, men halyqtyń qoldaýyn árdaıym sezindim. Bul maǵan kúsh-jiger berip, memleket basqarý isin tabysty júrgizýime yqpal etti. Jyl boıy saıası jáne ekonomıkalyq salalar boıynsha kóptegen reformalar júzege asyryldy. Bul saıasat aldaǵy kezeńderde de jalǵasa beredi. Elimizdi odan ári jańǵyrtýǵa, damytýǵa qatysty ıdeıalarym bar, ol ıdeıalardy halyq is júzinde sezingenin qalaımyn», - dedi suhbatynda Qasym-Jomart Toqaev.

Prezıdent biz memleket retinde de, ult retinde de bir orynda toqtap qalmaýymyz kerektigin aıtyp ótti.

«Ondaı jaǵdaıda el toqyraýǵa ushyraıdy. Onyń zardaby memlekettigimizge tıedi. Aýyr tıedi. Aşy da bolsa aıtaıyn, biz – qazaqtar, osynaý almaǵaıyp kúrdeli álemde, túptep kelgende, eshkimge sonshalyqty qajet emespiz. Óz memleketimizge ǵana qajetpiz. Osy bir qarapaıym qaǵıdany eshqashan esten shyǵarmaýymyz qajet. Álemdegi Qazaqstannyń jetistigin kóre almaıtyn, «mysyqtileý» saıasatkerler, tipti memleketter de bizden alystap ketken joq, mańaıymyzdan uzamaı, ár qadamymyzdy baǵyp otyr. Sondyqtan elimizdi órkendetý, kórkeıtý – tek qana óz qolymyzda. Bizdiń osyndaı syndarly sátte qatelesýge esh qaqymyz da, quqymyz da joq. Jáne memleket qurýshy ult retinde bul máseleni birinshi kezekte ózimiz tereń sezinýimiz qajet. Óıtkeni qazaq halqynyń taǵdyry tarıh tarazysynda tur…», - dedi Memleket basshysy.