Halyqtyń 94 paıyzy salyq organdarynyń jumysyna qanaǵattanady - saýalnama
Bul týraly búgin Qazaqstan salyq tóleýshileri qaýymdastyǵy ótkizgen saýalnamanyń nátıjesin jarııalaý barysynda málim etildi.
Táýelsiz sarapshylar jasaǵan saýalnama nátıjeleri kórsetkenindeı, salyq tóleýshilerdiń fıskaldy organ qyzmetiniń sapasyna qatysty qanaǵattanýshylyǵy 2012 jyly shamamen 10 paıyzǵa ósken. Mysaly, 2011 jylmen salystyrǵanda zańdy tulǵalardyń salyq organdaryna degen qanaǵattanýshylyǵy 86-dan 94 paıyzǵa deıin artqan. Al halyq arasyndaǵy qanaǵattanýshylyq deńgeıi 84 paıyzdan 94 paıyzǵa joǵarylaǵan.
«Jekelegen oblystarda tipti 100 paıyzdyq kórsetkish tirkeldi. Batys Qazaqstan men Qostanaı oblystarynda júrgizilgen saýalnama barysynda salyq organdaryna aryz túsirgen nemese onyń jumys sapasyna shaǵymdanǵysy keletin birde-bir azamat tabylǵan joq», - deıdi Qoǵamdyq pikirdi zertteý ortalyǵynyń bólim basshysy Aıjan Shábdenova.
Ortalyqtyń málimetterine sáıkes, Qazaqstan boıynsha orta eseppen alǵanda kezekte kútý ýaqytynyń uzaqtyǵy 26 mınýtqa deıin qysqarǵan. Almaty qalasynyń salyq tóleýshileri kezekte eń az turatyndyǵy anyqtaldy. Olar kezekte orta eseppen 6 mınýt turady. Al Almaty men Qaraǵandy oblystarynyń salyq tóleýshileri uzyn-sonar kezekterde turýǵa májbúr - sáıkesinshe 77 jáne 46 mınýttan.
Jıynǵa qatysqan QR Qarjy vıtse-mınıstri Ardaq Teńgebaevtiń aıtýynsha, joǵary sapaly memlekettik qyzmet kórsetý - barlyq úkimettik organdardyń negizgi mindetteriniń biri.
«Osy oraıda, salyq komıteti azamattardyń salyq organdaryna degen qanaǵattanýshylyq deńgeıin arttyrý úshin qyrýar jumystar atqarýda. Eń birinshi maqsat - halyqqa kórsetilettin qyzmetterdi avtomattandyrý, elektrondy nusqaǵa aýystyrý. 2011 jyly 35 memlekettik qyzmettiń tek 12-si avtomattandyrylǵan bolsa, 2012 jyly onyń sany 19-ǵa jetti», - deıdi vıtse-mınıstr.
Onyń aıtýynsha, 2013 jyly salyq organdary jeke kásipkerdi tirkeý jáne patent alýdy onlaın rejimde berý jobasyn iske qosty. Bul shara salyq organdary qyzmetkerlerimen bolatyn qarym-qatynasty azaıtýǵa baǵyttalǵan.