Halyqtyq baqylaý: BQO-da 10 kásiporyn eńbek qaýipsizdigin qamtamasyz etý jobasyn engizdi
BQO eńbek ınspektsııasy boıynsha basqarmasynyń basshysy Asylulan Dosjanovtyń málim etkenindeı, eńbek qaýipsizdigi men eńbekti qorǵaýdy qadaǵalaýdy kúsheıtý úshin Memleket basshysy elimizdiń barlyq óńirlerinde «Halyqtyq baqylaý» jobasyn engizý tájirıbesin usynǵan bolatyn. Mundaǵy maqsat – eńbek qaýipsizdigi men eńbekti qorǵaýdyń jaı-kúıin jaqsartý, sondaı-aq múgedektigi bar adamdardy ınklıýzıvti jumysqa ornalastyrýdy qoldaý.
Aıtýynsha, kúni búgin «QazArmaProm», «Kama Tsentr», «Hlebzavod №1», «Iskon», «Steklo-Servıs», «Agran», «Oral transformator zaýyty», «Oral Taza Servıs», «Kýbleı» jaýapkershiligi shekteýli seriktestikter men «Oral «Zenıt» zaýyty» AQ osy joba aıasynda jumys isteıdi. Sonymen qatar, 183 kásiporyn eńbek qaýipsizdigi jáne eńbekti qorǵaý standarttaryn engizdi (OHSAS 18001, MOT-SÝOT). 35 kásiporyn eńbek jaǵdaılary boıynsha attestattaýdan ótse, «Vizion Zero» tujyrymdamasyn qoldaý maqsatynda oblystyń 85 uıymy resmı saıtta «Kompanııa» retinde tirkeldi.
Basqarma basshysynyń aıtýynsha, ótken jyly eńbek ınspektorlary «Qaýipsiz eńbek» aktsııasy aıasynda 50-den astam ónerkásip jáne qurylys nysanyna shyǵyp, jumysshylardyń eńbek jaǵdaılarymen tanysyp, qorytyndysy boıynsha jumys berýshilerge baıqalǵan kemshilikterdi joıý boıynsha usynystar berildi. Sonymen qatar, 500-den astam qyzmetkerdi qamtı otyryp, eńbek qaýipsizdigi jáne eńbekti qorǵaý máseleleri boıynsha túsindirý jumystaryn júrgizdi.
Qazirgi tańda oblys kásiporyndarynda 428 óndiristik keńes jumys isteıdi, olardyń mindetterine óndiristik jaraqattanýdyń aldyn alý, jumys oryndaryndaǵy eńbek jaǵdaıyna tekserý júrgizýdi uıymdastyrý kiredi. Ótken jyly 3 415 (2021 jyly – 1 796) basshy men jaýapty qyzmetker jazataıym oqıǵalarǵa qatysty bilimderin tekserýden ótti.
Alaıda, profılaktıkalyq is-sharalarǵa qaramastan, ótken jyly oblysta óndiriste jaraqat alýshylar sany ósti. Arnaıy tergep-tekserý qorytyndysy boıynsha 2022 jyly 58 (onyń ishinde 7 toptyq) jazataıym oqıǵa tirkeldi, bul – 2021 jylmen salystyrǵanda 10 paıyzǵa (2021 jyly – 52, onyń ishinde 4 toptyq) kóp. Jazataıym oqıǵalar saldarynan barlyǵy 71 adam zardap shekti, bul – 2021 jylmen salystyrǵanda 17 paıyzǵa (2021 – 59) artyq. Sonyń ishinde 55-i aýyr jaraqat alsa, 16-sy qaza tapty. Bıyl 12 adam aýyr jaraqat (ótken jylǵy deńgeımen birdeı) alsa, 1 adam (2022 jyly osy merzimde – 5) kóz jumdy.
«Taldaý kórsetkenindeı, jazataıym oqıǵalar kóbinese jumys berýshilerdiń eńbek zańnamasy talaptaryn oryndamaýynan bolyp jatady. Keıbireýleri qaýipsizdik pen eńbekti qorǵaýdyń negizgi talaptaryn elemeıdi. Munyń sebepteri – kásiporyndarda eńbekti qorǵaý jáne gıgıena salasynda naqty saıasattyń jáne is-sharalardy basqarý júıesiniń bolmaýy, jumyskerler men jumys berýshiler arasynda yntymaqtastyqtyń tıisti uıymdyq qurylymy men tetiginiń joqtyǵy, eńbekti qorǵaý mádenıetiniń tómendigi. Qoryta aıtqanda, barlyq jazataıym oqıǵalar qandaı da bir tehnogendik qubylysqa táýeldi emes, ol jumys berýshi tarapynan baqylaýdyń bolmaýy, qyzmetkerlerdiń qaýipsizdik tehnıkasyn saqtamaýy, jeke qorǵanys quraldary men arnaıy kıimmen qamtamasyz etilmeýine jáne basqa adamı faktorlarǵa baılanysty ekenin atap ótkim keledi», - dedi A. Dosjanov óńirlik kommýnıkatsııalar qyzmeti alańynda ótken brıfıngte.