Halyqty jumyspen qamtý: 331 joba josparlanyp otyr

NUR-SULTAN. QazAqparat - Eńbek jáne halyqty áleýmettik qorǵaý mınıstrliginiń alqa májilisinde vedomstvo basshysy Serik Shápkenov 2021 jylǵa arnalǵan jumyspen qamtýǵa járdemdesý qadamdary týraly aıtty. Ony iske asyrý jumyssyzdyq deńgeıin 4,9 paıyzdan asyrmaı saqtap qalýǵa múmkindik beredi, dep habarlaıdy QazAqparat tilshisi.

Mınıstr Memleket basshysy Úkimetke memlekettik baǵdarlamalardy

2021 jyldyń birinshi jartysynyń sońyna deıin ulttyq jobalarǵa aınaldyrýdy qamtamasyz etýdi tapsyrǵanyn atap ótti. Bul jumys «Nur Otan» partııasynyń saılaýaldy tuǵyrnamasynda kózdelgen bastamalardy eskeredi. Oǵan sáıkes, 2021 jyldan 2025 jylǵa deıin 1,8 mln jańa jumys ornyn qurý kózdelgen.

Budan basqa, QR Prezıdenti jumyspen qamtýdyń óńirlik kartalaryn ázirleýdi tapsyrdy.

«Bizdiń oıymyzsha, olar ulttyq jobalar men aýmaqtardy damytý baǵdarlamalary (ADB) aıasynda qarastyrylǵan ekonomıkalyq mamandandyrýdy, keleshegi bar salalardy jáne óńirlerdiń barlyq jobalaryn eskerýge tıis. Biz óńirlik kartalardyń qurylymy týraly usynystardy Ulttyq ekonomıka mınıstrligine joldadyq. Olardy ákimder maquldaǵannan keıin Jumys oryndaryn qurýdy baqylaý jónindegi biryńǵaı aqparattyq júıede eskerý kerek», – dedi Serik Shápkenov.

Eńbekmıniniń basshysy, sonymen birge, halyqty jumyspen qamtýǵa járdemdesýdiń 2021 jylǵa josparlanǵan mindetteri men ındıkatorlaryn ortaǵa saldy. Birinshiden, 700 myńnan astam adamdy jumyspen qamtýdyń belsendi sharalarymen qamtý josparlanyp otyr, onyń ishinde:

- «Bastaý Bıznes» jobasy aıasynda 30 myń adam oqytylady, onyń 6 myńy jastar;

- Elektrondyq eńbek bırjasy arqyly 5000 jumyssyz jumys berýshilerdiń suranysy boıynsha suranysqa ıe daǵdylarǵa oqytylady.

Jastardy jumyspen qamtý bóliginde:

- «Birinshi jumys orny» jobasymen 1,5 myń adamdy qamtý;

- 10 myń memlekettik grant berý josparlanýda.

Jetim balalardyń kem degende 85%-y jumyspen qamtý ortalyqtary arqyly jumysqa ornalasady.

Eńbekke qabiletti jastaǵy múgedektigi bar adamdardyń jumyspen qamtylý úlesi 24%-ǵa deıin ulǵaıtylady.

Ekinshiden, Jumyspen qamtýdyń jol kartasyn iske asyrý jalǵasady.

2021 jyly 27 myńnan astam jumys ornyn qurý arqyly 331 joba josparlanyp otyr, onyń ishinde 10 myńnan astamy jobalar aıaqtalǵannan keıin turaqty bolyp qalady.

Úshinshiden, «EŃBEK» nátıjeli jumyspen qamtýdy jáne jappaı kásipkerlikti damytýdyń ulttyq jobasy mynadaı maqsattarǵa baǵyttalady:

- basymdyq berilgen quraldar arqyly halyqtyń nysanaly toptaryn jumyspen qamtýdy qoldaý;

- jumys ornynda jáne onlaın oqytý arqyly ekonomıka talaptaryna sáıkes jumys kúshiniń biliktiligin damytý;

- óńirler ekonomıkasyndaǵy zákirlik kooperatsııany jáne óndiristik tizbekterdi damytýǵa mıkrokredıt berý arqyly jeke sektorda jumys oryndaryn qurýdy qoldaý.

Mınıstrdiń paıymynsha, jumyspen qamtýǵa járdemdesý boıynsha josparlanǵan sharalardy iske asyrý 4,9%-dan aspaıtyn deńgeıde saqtaı otyryp, jumyssyzdyqtyń ósýine jol bermeıdi.