Halyqty aýyzsýmen qamtýdy sýbsıdııalaý ókilettigi jergilikti atqarýshy organdarǵa berilmek

NUR-SULTAN. QazAqparat – Parlament Májilisinde aýyzsýmen jabdyqtaýdy sýbsıdııalaýda ókilettikterdi ajyratý máselesi boıynsha zań jobasy birinshi oqylymda maquldandy, dep habarlaıdy QazAqparat tilshisi.

Ekonomıkalyq reforma jáne óńirlik damý komıtetiniń múshesi, depýtat Ýálıhan Qaınazarovtyń aıtýynsha, zań jobasy halyqty aýyzsýmen qamtamasyz etý úshin sýbsıdııany ýaqtyly bólý maqsatynda ázirlengen.

Zań jobasynda balamasyz sýmen jabdyqtaý kózderi sanalatyn asa mańyzdy jergilikti sýmen jabdyqtaý júıesiniń tizbesin ázirleý jáne bekitý jónindegi fýnktsııalardy ýákiletti organnan jergilikti atqarýshy organdarǵa berý kózdeledi.

Bul rette jańadan salynǵan jergilikti sýmen jabdyqtaý júıesiniń tizbesine engizý rásimi jergilikti deńgeıde júrgiziledi, bul óńirlerdiń aýyzsýmen jabdyqtaýǵa sýbsıdııa alýyn jyldamdatady.

Zań jobasynda sondaı-aq jergilikti atqarýshy organdardyń aýyzsýmen jabdyqtaýdyń balamasyz kózderi bolyp tabylatyn asa mańyzdy toptyq jáne jergilikti sýmen jabdyqtaý júıesnen halyqqa berilgen aýyzsýdyń bir tekshe metrine tólemaqy mólsherin ázirleý jónindegi quzyreti usynylady.

Al jergilikti ókildi organdarǵa ony bekitý jóninde ókilettik berý usynylady.

Jumys tobyna 17 usynys kelip tústi, olar jumys tobynyń bes otyrysynda, múddeli mınıstrlikter, jergilikti ókildi jáne atqarýshy organ ókilderiniń, sondaı-aq qoǵamdyq jáne saraptamalyq uıym ókilderiniń qatysýymen komıtettiń keńeıtilgen otyrysynda talqylanǵan.

Parlament Májilisiniń barlyq komıteti osy zań jobasy boıynsha oń qorytyndy bergen.