Halyqty aýyz sýmen qamtýǵa bólingen 1,8 mlrd teńge jemqorlardyń qaltasyna túsip ketken
«2016 jyldan bastap 2019 jyldyń mamyr aıyna deıin Sybaılas jemqorlyqqa qarsy qyzmet halyqty aýyz sýmen qamtamasyz etý salasynda 69 sybaılas jemqorlyq qylmysyn tirkedi. Osy salada memleketke kelgen zalal - 1,8 mlrd teńge. 32 adam qylmystyq jaýapkershilikke tartylyp, 24-i sottalǵan. Taldaý kórsetkendeı, qylmystyń jartysynan astamyn laýazymdy tulǵalar memlekettik satyp alý sharttary boıynsha oryndalǵan jumystar aktilerine jalǵan qol qoıý arqyly jasaıdy. Kóbinese bıýdjet qarajatyn urlaý (25), para alý (14) jáne ókilettikti asyra paıdalaný (13) faktileri tirkeledi», - dedi ol Sybaılas jemqorlyqqa qarsy is-qımyl agenttiginde ótken baspasóz máslıhatynda.
Mysaly, onyń dereginshe, Jambyl oblysynda aǵymdaǵy jyldyń 14 maýsymynda «Órken» jaýapkershiligi shekteýli seriktestiginiń dırektory Ó.Músirálıev asa iri kólemde jalpy somasy 706 mln teńgeni quraıtyn bıýdjet qarajatyn jymqyrý faktisi boıynsha 6 jylǵa bas bostandyǵynan aıyrylǵan. Sonymen qatar, sottalýshy bas bostandyǵy jazasyn ótep bolǵannan keıin 3 jyl qurylys salasynda jumys isteı almaıdy. Bul aqsha memlekettiń 100 paıyz qatysý úlesi bar «Taraz hımııalyq parki» erkin ekonomıkalyq aımaǵy basqarýshy kompanııasy» aktsıonerlik qoǵamy úshin magıstraldy sýaǵar qurylysyn salýǵa arnalǵan. Keltirilgen zalal tolyǵymen óndirilgen.
«Qazirgi ýaqytta Mańǵystaý oblysynda «Qazsýshar» respýblıkalyq memlekettik kásipornynyń oblystyq fılıalynyń laýazymdy tulǵalaryna qatysty aýyz sý satyp alýdy sýbsıdııalaýǵa bólingen 30 mln teńgeden astam bıýdjet qarajatyn jymqyrý faktisi boıynsha qylmystyq is tergelýde. Taǵy bir jarqyn mysal - bárińizge belgili Soltústik Qazaqstan oblysy Sokolov toptyq sý qubyryn qaıta jańartý boıynsha kelisimshart jasasý kezinde 60 mln teńge somasynda para alý faktisi boıynsha Sý resýrstary komıtet tóraǵasyna qatysty qylmystyq is. Osy is boıynsha sotqa deıingi tergeý júrip jatyr, kúdikti sottyń sanktsııasymen kúzetpen ustalýda», - dedi Q.Súleımenov.