Halyqtan memlekettik qyzmettiń qandaı túrlerine qatysty shaǵym kóp túsip jatyr

NUR-SULTAN. QazAqparat – QR Memlekettik qyzmet isteri jónindegi agenttiktiń memlekettik qyzmet departamentiniń dırektory Eldar Úısimbaev jer qatynastary, áleýmettik sala, turǵyn úı sharýashylyǵy salasynda qyzmet kórsetetin memlekettik qyzmetshilerdiń jumysyna shaǵym kóbirek túsetinin málimdedi, dep habarlaıdy QazAqparat tilshisi.

«Qazaqstanda eń jıi suralatyn memlekettik qyzmetterdiń birinshi leginde dárigerge jazylý qyzmeti tur. Biraq bul sanatta kemshilik barshylyq. Memlekettik tirkeýge minjetti emes jyljymaly múlikti tirkeý máselesinde de tehnıkalyq aqaý jıi kezdesedi. Osy rette halyqtyń oryndy synyn eskerip, tıisti sheshim qabyldaý úshin agenttik memlekettik organdarǵa aqparattyq júıelerin aprobatsııadan ótkizýdi usynyp jatyr», - dedi Eldar Úısimbaev elordada ótken baspasóz máslıhatynda.

Onyń aıtýynsha memlekettik qyzmetti ala almaǵan azamattardyń quqyǵyn qorǵaý máselesine basa nazar aýdarylyp jatyr.

«2020 jyly agenttik pen onyń aımaqtardaǵy bólimderine 1442 shaǵym kelip tústi. Kóp jaǵdaıda jer qatynastary, áleýmettik sala, turǵyn úı sharýashylyǵy salasynda qyzmet kórsetetin memlekettik qyzmetshilerdiń jumysyna shaǵym kóbirek túsedi», - dedi ol.

Eske sala ketsek buǵan deıin BUU reıtınginde 2020 jyly Qazaqstanda elektrondy úkimet deńgeıi 10 pozıtsııaǵa jaqsarǵany habarlanǵan bolatyn. Atalmysh reıtıngte Qazaqstan 193 memlekettiń ishinde 29-shy orynda tur.