Halyqpen birgemiz: Májilis depýtattary aqtaýlyqtarmen kezdesti
Májilis depýtattary Samat Musabaev pen Edil Jańbyrshın Aqtaý turǵyndarymen kezdesip, suıytylǵan gazdyń baǵasyna baılanysty týyndaǵan jaǵdaıdy talqylady.
«Bul jerge sizder úshin kelip turmyz. Senderdiń janaıqaılaryńdy, máselelerińdi, bárin Úkimetke, Parlamentke, ákimge, mınıstrge jetkizýge mindettimiz», - dedi Samat Musabaev halyqtyń ortasyna shyǵyp.
Onyń aıtýynsha, suıytylǵan munaı gazynyń baǵasyn Úkimettik komıssııa naqtylaýy kerek.
«Komıssııa jumysy ári qaraı jalǵasady. Ashyq otyrys bolady, jabyq otyrys bolady. Sonyń bárine qatysamyz, biz sizdermen árdaıym birgemiz. Baǵany túsirýge, áli de túse me, 85 kúıinde qala ma, sol turǵyda jumys isteımiz», - dedi depýtat.
Eske salsaq, Memleket basshysy Qasym-Jomart Toqaev Twitter-degi suıytylǵan gaz baǵasynan bastalǵan paraqshasynda Jańaózendegi jaǵdaıǵa qatysty jazba jarııalaǵan bolatyn.
«Úkimetke Jańaózendegi jaǵdaıdy ekonomıkalyq turǵydan eskerip, quqyqtyq jaǵynan tez arada qarastyrýdy tapsyrdym. Sherýge shyqqandar qoǵamdyq tártipti buzbaýy tıis. Azamattardyń jergilikti jáne ortalyq bılik organdaryna talabyn ashyq aıtýǵa quqyǵy bar, biraq, bul zańǵa, naqtyraq aıtqanda, beıbit sherýler týraly zańǵa sáıkes júzege asyrylýy kerek» delingen jazbada.
Al QR Premer-Mınıstriniń resmı saıty Mańǵystaý oblysyndaǵy janarmaı stansalarynyń ıeleri suıytylǵan munaı gazynyń qunyn lıtrine 120 teńgeden 85-90 teńgege deıin tómendetý týraly sheshim qabyldaǵanyn jazdy.
QR Parlamenti Májilis depýtaty Erlan Saırov Úkimet baǵa dálizderin belgileý arqyly baǵanyń uzaq merzimdi turaqtylyǵyn qamtamasyz etetinin aıtyp, halyqty sabyrǵa shaqyrdy.