Halyqpen ashyq ári ádil dıalog júrgizý kerek - Nursultan Nazarbaev

ASTANA. QazAqparat - QR Prezıdenti Nursultan Nazarbaev "Nur Otan" partııasy arqyly áleýmettik mańyzy bar máselelerdi bárin baqylaýdy tapsyrdy, dep habarlaıdy QazAqparat tilshisi.

"Partııa halyqtyń kúndelikti máselelerin sheshýge belsene atsalysýy qajet. Atalǵan jumys "Halyqqa kómek" jobasyn da kúsheıtedi degen senim bar. Búginde qoǵamnyń ózekti máselelerin der kezinde anyqtap, memlekettik organdardy soǵan qaraı jumyldyrý qajet. Bul - naǵyz nátıjeli strategııa. Ol úshin halyqpen keri baılanystyń myqty júıesin jasap shyqqan jón", - dedi N.Nazarbaev "Nur Otan" partııasynyń XVIII sezinde.

Prezıdenttiń aıtýynsha, búginde "Nur Otan" partııasynyń qabyldaý bólimshelerin barynsha kúsheıtý kerek. Atalǵan qurylymdar halyqqa kómek berýdiń "biryńǵaı terezesine" aınalýy shart. "Bul jerde bıýrokratııaǵa jol joq. "Nur Otan" partııasynyń barlyq fılıaldary soǵan kúsh salýy qajet. Partııa halyqtyń barlyq sanattaryn qorǵaı bilýi kerek. Sóıtip, memleket pen halyq arasyndaǵy kópir ispettes bolýy shart", - dep atap kórsetti N.Nazarbaev.

Memleket basshysy memlekettik baǵdarlamalardyń tıimdiligin baqylap otyrý máselesine de basa nazar aýdardy. Sebebi atalǵan bastamalardyń barlyǵy sátti iske assa, halyqtyń ál-aýqaty kóteriledi.

Aıta keteıik, búgin Memleket basshysy Nursultan Nazarbaev kópbalaly otbasylarda árbir balanyń tólemaqysyn 21 myń teńgege deıin arttyrýdy tapsyrdy. Budan bólek, múgedek balalardy asyrap otyrǵan otbasylardyń járdemaqysy 30 protsentke ósedi.