Halyqqa zań turǵysynan kómektesýdi bastaımyz - Izgilik elshisi jobasynyń jetekshisi
Bul týraly QazAqparat tilshisine «Akselerator dobra - Izgilik elshisi» qozǵalysynyń jetekshisi Aınur Sábıtova aıtty.
Abaı atyndaǵy qazaq pedagogıkalyq ýnıversıtetiniń Qazaqstan-Sarbonna ınstıtýtynyń dırektory, joba jetekshisi Aınur Sábıtova búgin Nur-Sultanda bolǵan volonterlar front-ofısiniń ashylý saltanatyna qatysyp keldi.
«Bıyl Prezıdent Volonterlar jylyn bastap berdi. Búgingi shara óte joǵary dárejede ótti. Suhbat alańyna eldegi barlyq volonterlar, qaıyrymdylyq uıymdarynyń basshylary qatysty. Qaı salada bolmasyn áleýmettik qoldaý, ekologııa, bilim berý boıynsha jumys istep júrgen volonterlardyń barlyǵy bas qosty. Prezıdenttiń «Volonterlar – eliniń naǵyz patrıoty» degen sózi júregimdi qatty tolqytty. Shynymen de qazirgi zamanda ýaqytyn basqa adamǵa kómek berý úshin tegin bólý tek qana batyrlardyń qolynan keledi», - dedi ol.
Birneshe aı buryn paıda bolǵan «Izgilik elshisi» qozǵalysy júzdegen jasty qaıyrymdylyq jolynda biriktirip úlgergen.
«Bul – azamattyq pozıtsııasy aıqyn qala turǵyndary, jastar, muǵalimder, stýdentter. Olar ýaqytyn keshke teledıdar kórip te ótkizse bolar edi, biraq, bos ýaqytynda muqtaj adamdarǵa kómektesýdi jón sanaıdy. Biz áleýmettik, bilim salasynda muqtaj adamdarǵa turmystyq kómek beremiz. Úkimetten basqa seneri qalmaǵan úlken kisilerge, múmkindigi shekteýli bala baǵyp otyrǵan otbasylarǵa, naýqastarǵa kómek beremiz», - dedi Aınur Sábıtova.
Prezıdent Jastar jylyn qorytyndylaı kele volonterlardyń barlyǵyna birigý kerektigin aıtqan bolatyn.
«Prezıdenttiń aıtqany óte oryndy. Bizge ár saladaǵy kúshimizdi nyǵaıtý úshin birigý kerek. Árkim óz baǵytyn anyqtap alýy kerek. Bereke túbi – birlik degen sóz bar», - dedi ol.
«Izgilik elshisi» jobasynyń volonterlary bolashaqta zań turǵysynan keńestik kómek berýdi qolǵa almaq.
Qoǵamda zań turǵysynan sheshilmegen túıtkildi máseleleri kóp adamdar jeterlik.
«Olardyń kópshiligi saýatty advokattardan, zańgerlerden kómek ala almaıdy. Sebebi, qaltalary kótermeıdi. Biz óz múmkindigimizdi baǵamdap kórdik. Bizde bilikti oqytýshylar, stýdentter, zańgerler barshylyq. Olardyń kópshiligi birigýge ynta bildirdi. Muqtaj jandarǵa zań turǵysynan kómek beretin bolamyz. Tipti bizge kele almaıtyn, quzyrly organdardyń tabaldyryǵyn tozdyra almaıtyn adamdar bar. Olarǵa úıine baryp kómek kórsetetin bolamyz. Sonymen qatar, bizdiń eriktiler áleýmettik jáne ınklıýzıvti bilim berý salasynda da tegin kómek kórsetetin bolady», - dedi ol.
Osy baǵytta atalǵan volonterlik qozǵalys sheteldik úzdik tájirıbeni ózderine ıgermek.
Aıta ketsek, elordada Prezıdent Qasym-Jomart Toqaev EKSPO kórmesiniń «Art Hub» pavılonynda ornalasqan volonterlardyń «Birgemiz» respýblıkalyq front-keńsesiniń ashylý saltanatyna qatysty .
Front-keńse búkil Qazaqstannyń volonterlary úshin keńes berý, ádistemelik, oqytý jáne aqparattyq ortalyqqa aınalatyn bolady. Sondaı-aq, ol volonterlik jobalar men oqytý baǵdarlamalaryn úılestirý, monıtorıng jasaý, volonterlikti ilgeriletý boıynsha biryńǵaı aqparattyq saıasatty júrgizedi jáne biryńǵaı Call-ortalyqtyń jumysyn uıymdastyrady.